DILI, 31 Jullu 2025 (TATOLI)—Autoridade Inspesaun Fiskalizasaun Atividade Ekonómika Sanitária no Alimentar (AIFAESA) kontinua halo inspesaun ba indústria bolachas (bakery) no padeiru iha Dili laran hodi garante ijiéne ba konsumidór sira.
Diretór Departamentu Metereolójia no Padronizasaun, José Reis Amaral, hateten atividade ne’ebé ohin loron ekipa AIFAESA halo konsidera hanesan inspesaun konsentrada, ne’ebé mak hala’o husi nasaun membru CPLP hotu ho papél kompeténsia ba seguransa alimentár no atividade ekonómika nian.
“Inspesaun ohin loron konsege rejista estabelesimentu hamutuk 13 no konsege identifika fatin rua (2) mak hetan infrasaun, ida iha zona Cristo Rei no ida iha zona Vera Cruz,” Diretór ne’e informa ba jornalista sira iha padeiru Sepolije, Audian, kuarta (30 Jullu 2025) ne’e.
Nia afirma, ida-ne’e tanba sira uza materiál ingredentes ne’ebé liu prazu no ida seluk tanba kondisaun la ijiéne, enkuntu rekezitu ne’ebé mak iha bainhira AIFAESA halo inspesaun ba fatin ida mak identifika krítiku lima ne sei kondidera infrasaun.
“Baibain husi prosesu ne’ebé iha katak ami sei submete auto notísia ida ba inspetora jerál hodi foti desizaun tuir prosedimentu legál ne’ebé mak iha, bele aplika koima ka enseramentu temporária durante fulan ida,” nia esplika.
Maibé karik liu loron ka semana mak empreza sira-ne’e hadi’a ona infrasaun refere bele propoin karta pedidu ba AIFAESA hodi halo reinspesaun.
“Aleinde ne’e haree mós ba produtu bolachas (dose maran) ne’e falun ne’e tenke taka ho nota ingredientes, nune’e bele evita konsumidór ruma ne’ebé iha alérjia ka moras bainhira konsumu produtu refere,” nia apela.
Tanba, nia dehan, dalabarak konsumidór sira mai sosa produtu sempre haree mós ba ninia ingredientes, liuliu ba sira-ne’ebé moras raan midar no alérjia ruma ba boek, tanba se latau ingredientes iha produtu konsumidór mós laiha informasaun konkreta ba produtu.
Reprezentante traballadora iha padaria Sepolije, Elisa Belo, hato’o gradesementu ba AIFAESA nia prezensa iha sira-nia fatin tanba ho ida-ne’e bele fanun sira atu prodús aihan ruma ho ijiéne ba konsumidór sira.
“Ho fallansu ne’ebé iha ami bele hadi’ak di’ak liután. Ami mós prontu koopera ho saida mak ohin ekipa AIFAESA nian relata ona katak, tenke uza luvas bainhira halo produsaun ruma no tau nota ingredientes ba kada produtu ne’ebé ami iha,” nia hateten.
Tamba, tuir nia, iha sira-nia fatin la’ós eziste de’it ho padaria maibé iha mós restaurante, nune’e sira sei esforsu garante ijiéne ba konsumidór sira-ne’ebé ba vizita sira-nia fatin.
Jornalista : Alexandra da Costa
Editór : Cancio Ximenes
