ATAMBUA, 06 Agostu 2025 (TATOLI)—Rádiu Televizaun Timor-Leste, Empreza Públika (RTTL, E.P) ho Rádiu Repúblik Indonézia (RRI) iha Atambua renova akordu kooperasaun ba informasaun sobre promosaun fatin turístiku, ekonomia, sosiál iha área fronteira.
“Informasaun sira ne’ebé promove mak turizmu, kultura, eskola, biodiversidade, atividade ekonómika iha fronteira”, dehan Sekretáriu Estadu asuntu Komunikasaun Sosiál, Expedito Loro Dias Ximenes, ba jornalista sira iha edifísiu RRI Atambua, kuarta-ne’e.
Nia esplika objetivu prinsipál husi programa ne’e mak ho naran saudades, karakter husi programa divertimentu ho múzika, mensajen badak sira konaba turizmu, kultura, eskola, biodiversidade no interasaun.
Programa referidu sei lansa iha tempu badak. “Ha’u ho Prezidente no Diretór Utama ko’alia ho diresaun sira hotu no tékniku sira tuur hamutuk atu oinsá mak ita lansa iha tempu badak”.
Membru governu ne’e esplika, RTTL, E.P ho Diretór Utama RRI sei halo diskusaun téknika liu, atu bele hamosu programa ne’e iha tempu badak, tanba interesante no presiza atu bele iha informasaun tantu programa ne’e medida toka múzika Timor nian no Indonézia.
Iha fatin hanesan, Diretór Utama Lembaga Penyiaran Publik RRI, Ignatius Handrasmo, hatete hasoru malu ne’e atu haforsa no optimiza papél ne’ebé halo iha komunidade, liuliu turizmu, múzika no ekonomia sosiál.
“Ko’alia konaba ba kolaborasaun iha divertimentu hodi fahe esperiénsia informasaun konaba komunidade ne’ebé hela iha área fronteira, oinsá mak bele lori turizmu, ekonomia sosiál”, dehan nia.
Oportunidade ne’e, SEKOMS halo vizita bá edifisiu administradór Atambua no partisipa lansamentu tais iha edifísiu RRI Atambua.
Jornalista : Felicidade Ximenes
Editora : Rita Almeida
