DILI, 08 Agostu 2025 (TATOLI) – Prezidente Konsellu Diretivu Ajénsia Notisioza Timor-Leste Tatoli, Noémio Falcão, no Reitór Institute of Business (IOB), Pedro Barreto Ximenes, asina akordu kooperasaun hodi fortalese serbisu iha área oioin.
Kooperasaun ida-ne’e permite Tatoli no IOB halo atividade hanesan Tatoli kobertura ba eventu akadémiku, organizasaun semináriu sientífiku, formasaun jornalizmu, programa estájiu profisionál, interkámbiu no seluk tan.
Akordu ida-ne’e iha durasaun tinan lima no bele renova tuir konkordánsia parte rua. Asinatura memorandu ne’e halo husi Prezidente Konsellu Diretivu Tatoli, Noémio Falcão, no Reitór IOB, Pedro Barreto Ximenes, ho sasin husi Prezidente Repúblika, José Ramos-Horta, no Sekretáriu Estadu Komunikasaun Sosiál (SEKOMS), Expedito Dias Ximenes, iha salaun IOB, Fomentu, Dili.
Noémio Falcão hateten hafoin asinatura memorandu ne’e, parte rua bele halo komunikasaun téknika ba implementasaun akordu ne’e.
Nia esplika katak iha programa Tatoli kobertura maka hanesan mídia estatál, nesesáriu tebes Tatoli halo kooperasaun ho universidade no institutu privadu atu sai hanesan parseiru.
“Kobertura husi mídia estatál hanesan pasu ida atu oinsá universidade privada la taka an ba Governu, hodi haree realidade saida mak akontese iha universidade privada sira hanesan IOB no nia kontribuisaun pozitiva sira ba dezenvolve Timor-Leste”, dehan.
Akordu kooperasaun ne’e mós loke dalan ba IOB no Tatoli atu kada tinan organiza semináriu ho eskala nasionál no internasional, ne’ebé envolve líder istóriku no jerasaun foun sira, akadémiku no sosiedade hotu.
Aleinde ne’e, parte rua mós kolabora atu organiza eventu Dies Natalis, liuliu halo tranzmisaun direta no Tatoli mós sei toma konta hasai foto ofisiál ba judisium no graduasaun estudante. Kolabora atu fasilita estudante finalista sira iha IOB bele halo estájiu profisional iha Tatoli.
Iha programa formasaun nian, loke dalan ba IOB no Tatoli hodi halo formasaun jornalizmu no bele dezenvolve hamutuk jornál parede dijitál. Iha interkámbiu nian, instituisaun rua ne’e sei dezenvolve servisu profisionál no ikus mak Programa Tatoli ne’e permite IOB nu’udar sentru akadémiku bele prienxe programa sira iha Tatoli, hanesan entervista eskluziva, Tatoli Hakbesik, Tatoli klarifika no programa seluk ne’ebé sei mosu.
Reitór IOB, Pedro Barreto Ximenes, akresenta akordu ne’ebé parte rua asina importante tebes. “Akordu ne’e hahú ona ohin, ita realiza ona semináriu nasionál no ba oin sei kontinua nafatin atividade hanesan ho Tatoli”, nia dehan.
Tatoli kria husi dekretu-lei númeru 21/2017, 24 Maiu, no dezempeña nia funsaun hanesan mídia Estadu Timor-Leste. Tatoli nia objetivu prinsipál mak sai fonte informasaun ofisiál, ho produsaun notísia ba públiku iha eskala nasionál, rejionál no internasionál.
IOB hanesan instituisaun ensinu superiór privadu, nia ezisténsia iha loron 20 Agostu tinan 2002, no kontribui ba formasaun no preparasaun profisionál ba jerasaun foun iha Timor-Leste.
Notísia relevante: Tatoli no IOB promove diskusaun kona-ba Konseitu Estadu ho oradór prinsipál Ramos-Horta
Jornalista: Nelson de Sousa
Editora: Maria Auxiliadora
