DILI, 08 Agostu 2025 (TATOLI) – Ajénsia Notisioza Timor-Leste -Tatoli, I.P koopera ho Institute of Business (IOB) hodi realiza, ohin, semináriu nasionál ho tema “Konseitu Estadu no Vizaun Estratéjika ba Dezenvolvimentu Nasionál”.
Oradór prinsipál iha semináriu ne’e mak Prezidente Repúblika José Ramos-Horta no eventu ne’e hetan abertura husi Sekretáriu Estadu Komunikasaun Sosiál (SEKOMS), Expedito Loro Dias Ximenes.
Iha atividade ne’e, Prezidente Konsellu Diretivu Tatoli, I.P, Noémio Falcão, hateten semináriu ne’e organiza relasiona ho aniversáriu Tatoli, I.P nian ba-dasiak, ne’ebé selebra kada tinan iha loron 27 Jullu dezde nia kriasaun iha 2016.
“Apresia ba kooperasaun ne’e tanba iha era dijitál ida-ne’e importante tebes atu rona temátiku ne’ebé sei ko’alia ohin kona-ba Konseitu Estadu no Vizaun Estratéjika ba Dezenvolvimentu Nasionál. Husu estudante sira no ita hotu iha mahon ida-ne’e atu aproveita ho di’ak, tanba sai hanesan bukae ida ba ita”, Noémio Falcão hateten iha kampus IOB, Fomentu, ohin.
Reitór IOB, Pedro Ximenes, mós agradese ba Tatoli tanba bele organiza ona eventu ida-ne’e hodi halibur estudante sira atu rona diretamente kona-ba temátiku importante ne’ebé sei ko’alia iha loron ohin.
“Ita presiza apresia eventu ne’e, tanba ko’alia kona-ba Konseitu Estadu no Vizaun Estratéjika ba Dezenvolvimentu Nasionál ne’e importante tebes ba foinsa’e sira, liuliu ba estudante bele aprende iha era dijitál, iha mundu ohin loron nian”, nia salienta.
Iha abertura ne’e, Sekretáriu Estadu Komunikasaun Sosiál, Expedito Loro Dias Ximenes, husu ba estudante sira atu aproveita didi’ak iha era dijitál, iha mundu ohin loron nian.
Nia esplika katak daudaun ema hotu bele prodús informasaun liuhusi telefone android, maibé informasaun ne’ebé ema prodús dalaruma mós bele prejudika ema seluk, tanba la liu husi edisaun. Maibé informasaun ne’ebé prodús liuhusi mídia konvensionál hanesan rádiu, televizaun mak informasaun ida ne’ebé kredivel tanba liuhusi prosesu edisaun.
“Daudaun ita moris iha era dijitál ne’ebé laiha ona limita ita-nia komunikasaun. Ohin loron saida mak akontese mundu tomak bele hatene, tanba evolusaun teknolojia maka’as tebes, maibé imi joven nu’udar futuru nasaun nian, tenke utiliza mídia sosiál ida-ne’e ho di’ak nune’e dezenvolve nasaun ida-ne’e ba oin”, Expedito husu.
Lembra katak, Tatoli antes ne’e promove ona semináriu ho tópiku hanesan iha Dili Institute of Technology (DIT), no Universidade Orientál Timor Lorosa’e (UNITAL) ho oradór xave mak Lere Anan Timur, no Vise-Primeiru-Ministru no Ministru Koordenadór ba Asuntu Sosiál no Ministru Dezenvolvimentu Rurál no Abitasaun Komunitária, Mariano Assanami Sabino.
Notísia relevante: Tatoli-UNITAL organiza diskusaun kona-ba Konseitu Estadu no Vizaun Estratéjika
Jornalista: Arminda Fonseca
Editora: Maria Auxiliadora
