DILI, 21 Agostu 2025 (TATOLI)-Primeiru-Ministru, Kay Rala Xanana Gusmão, kongratula telekomunikasaun Telemor tanba lansa ona servisu komersiál 5G ho ofisialmente iha Sentru Konvensaun Dili (CCD, sigla portugés) kinta-ne’e.
Okaziaun ne’e, Xefe Governu mos kongratula ezisténsia Telemor, ne’ebé kontribui ona ba prosesu dezenvolvimentu iha área telekomunikasaun hodi permite sidadaun iha teritóriu asesu no apoiu governasaun iha área eletróniku.
“Ita hato’o bemvindu ba futuru foun ho 5G, Telemor di’ak liu”, Xanana hato’o iha nia diskursu. Nia mos husu ba atu operadór ne’e sei oferese servisu, no fasilita liutan konesaun dijitál ba mundu.
Ministru Transporte Komunikasaun (MTK), Miguel Manetelo, espera operadór ne’e sei oferese velosidade internet ho kapasidade lais liután hodi kontribui ba konetividade iha setór hotu.
Governante ne’e husu Telemor atu kompleta infraestrutura telekomunikasaun balun hodi suporta 5G ne’e rasik bele funsiona to’o territóriu.
Diretór Jerál Telemor, Vū Dúc Nguyén, hateten inisiativa ne’e hanesan inovasaun ne’ebé ho determinasaun hakarak serbisu hamutuk ho Governu no povu Timor-Leste hodi loké área foun, aumenta no dezenvolve konesaun dijitál ba mundu.
Nia dehan, 5G kualidade aas hodi suporta konesaun dijitál iha serbisu públiku ho lalais, fasilita serbisu tranzasaun finanseiru dijitál iha fatin ne’ebé de’it, edukasaun dijitál, konesaun entre estudante, aumenta koñesimentu ho mundu, dijitál saúde ho seluk tan.
Produtu ne’e, nia dehan sei fasilita dijitalizasaun ekonomia ba konesaun rejionál no globál, tanba Timor-Leste sai hanesan membru Organizasaun Mundiál Komérsiu (OMK) no prepara sai membru plenu ba Asosiasaun Nasaun Sudeste Aziátiku (ASEAN, siglá inglés).
“Agradese ba serbisu hamutuk ho Governu Timor-Leste. Ohin ita loke odamatan bá área foun ho teknolójia”, katak nia.
Partisipa iha serimónia ne’e, Vise Primeiru Ministru Asuntu Ekonómiku no Ministru Turizmu no Ambiente no Koordenadór Ekonómiku, Francisco Kalbuadi Lay, ho membru Governu balun no entidade sira seluk.
Notísia relevante: Reforsa kapasidade, Telemor lansa servisu komersiál 5G
Jornalista : Nelson de Sousa
Editora : Rita Almeida
