DILI, 22 Agostu 2025 (TATOLI)—Ekipa Zebra Klube Futeból (Zebra FC-sigla ingleza) husu órgaun Liga Futeból Timor-Leste (LFTL) atu aselera alokasaun orsamentu relasiona akomodasaun ne’ebé durante ne’e apoia ba klube futeból sira hodi hala’o atividade jogu LFTL.
Treinadór Zebra FC, Rogério Moc hateten ezijénsia referida hato’o relasiona ho kondisaun klube Zebra tanba distánsia dook, tan ne’e nesesita atu utiliza orsamentu hodi aloka ba akomodasaun no operassionál hanesan viajen husi Baukau ba Estádiu Gleno, Munisípiu Ermera.
“Osan ba akomodasaun tarde difikulta tebes ami atu halo preparasaun,” Rogério Moc informa ba TATOLI liuhosi telefónema, Sesta ne’e.
Moc haktuir orsamentu referidu apoia husi Governu liuhusi Ministériu Juventude, Desportu, Arte no Kultura (MJDAK) ne’ebé kada klube iha direitu hetan $450 iha kada jogu.
Zebra rasik seidauk simu orsamentu ne’e durante jogu rua ba kotuk, iha-ne’ebé hala’o ona kontatu ho parte kompetente maibé to’o agora seidauk hetan resposta.
“Orsamentu ne’e tuir loloos iha uluk ona ami-nia liman maibé realidade laiha entaun inpaktu ba ami-nia preparasaun,” Moc konfesa.
Moc konsidera jogu iha LFTL presiza iha orsamentu tanba sai determinasaun ba kualidade kompetisaun bazeia ba kondisaun klube, nune’e nafatin rekomenda ba Órgaun Liga atu aselera prosesu administrasaun sira nune’e klube bele aloka tuir nesesidade iha terrenu.
Entertantu, Governu liuhosi MJDAK aloka orsamentu hamutuk rihun $200 ba LFTL ho objetivu apoiu klube futeból sira primeiru no segunda divizaun iha-ne’ebé klube ida hetan apoia $450 ba kada jogu.
Jornalista: Natalino Belo
Editór: Xisto Freitas da Piedade
