DILI, 25 Agostu 2025 (TATOLI)—Ministériu Edukasaun (ME) iha semana oin ne’e sei atribui subvensaun públika ba Eskola Ensinu Sekundária Tékniku Vokasionál (ESTV) tolu hodi fasilita liután nesesidade ba estudante sira ne’ebé hela iha koléjiu.
Eskola tolu ne’e mak hanesan informa ESTV Natarbora, ESTV Maumali, no ESTV Moliana
“Ba ESTV Maumali, segundu transferénsia ita tama ona iha finansa, hein semana ida-ne’e bainhira buat hotu la’o di’ak, entaun semana oin fali hanesan ne’e ita halo ona transferénsia,” Diretór Nasionál Ensinu Tékniku Vokasionál iha ME, Fernando Mouzinho Gama, informa ba jornalista sira, iha Sentru Konvensaun Dili (CCD, sigla portugés), Merkadu Lama, Segunda ne’e.
Diretór ne’e esplika, subvensaun públika no konsensaun eskolár la hanesan, subvensaun publika fó apoiu espesiál ba eskola sira ne’ebé estudante sira hela.
“Ezemplu hanesan ESTV Moliana, Maumali no Natarbora ne’e estudante sira hela iha koléjiu. Tanba ne’e ita fó subvensaun públika,” nia akresenta.
Subvensaun ba eskola ESTV Maumali kada tinan hetan orsamentu $300.000 inklui ona ho hahán, manutensaun, no selu mós profesór sira.
“Tanba eskola Maumali hanesan Eskola Públika maibé jestaun privada, entaun ita halo kontratu ho profesór sira. Enkuantu Eskola Moliana no Natarbora mos ita fó subvensaun públika, kada eskola purvolta $150.000 ba leten, purtantu eskola rua ne’e ita kuaze prevee $400.000 tanba estudante hotu iha asrama (koléjiu),” nia katak.
Notísia relevante : ME solisita dirijente ESJ atu submete relatóriu konsensaun eskolár
Eskola sira ne’ebé hetan konsesaun eskolár daudaun ne’e hahú submete ona relatóriu bá ministériu.
“Konsensaun eskolár ba ESTV sira ba períodu primeiru, agora relatóriu submete ona mai, nune’e ita enkamiña ba Diresaun Finansa hodi prosesu filafali segunda transferénsia,” Diretór hato’o.
Iha fatin hanesan, Diretór Nasionál Ensinu Sekundária Jerál iha ME, Benjamin Fernandes, , admite katak simu ona relatóriu husi eskola sira.
“Maibé iha eskola ida ka rua mak seidauk tanba sei sala oituan. Sira ba hadi’a foin tama hotu ona, Baukau foin submete mai dadeersan ne’e no daudaun ami tama ona ba segundu trimestrál. Nune’e, molok tama ba ezame nasionál laiha ona problema kona-ba konsesaun eskolár tanba osan referidu atu prepara ba ezame pasajen no ezame nasionál,” nia hato’o.
Eskola ensinu sekundária jerál kompostu husi públiku no filiál 54, enkuantu sekundária privadu iha ualu.
Jornalista : Osória Marques
Editora : Julia Chatarina
