DILI, 30 Agostu 2025 (TATOTI)—Sarani Katólika Timor-Leste hamutuk ho ulun-boot Uma-Kreda Katólika, Sábadu ne’e, ofisialmente entrega hikas fali Krús Joven no Illas Na’in-Feto ne’ebé vizita Timor-Leste durante semana ida, ba Delegadu Koreanu ne’ebé sei kontinua halo viajen bá Tailándia.
Serimónia entrega ne’e hala’o iha Aeroportu Internasionál Prezidente Nicolau Lobato, Komoro -Dili, hafoin misa despedida ne’ebé hala’o iha Igreja Katedrál, ne’ebé prezide husi Arsebispu Arkidioseze Metropolitana Dili, Don Virgílio Kardeál do Carmo da Silva.
Reprezentante Delegadu Koreanu, Padre Pedro, sente orgullu no agradese tebes ba povu no sarani Timor-Leste ne’ebé simu Krús Joven Internasionál no Illas Na’in-Feto ho di’ak tebes durante semana ida.
“Imi hatudu duni mai ami kona-ba timoroan nia fiar no domin ba Maromak, ami agradese tebes durante ami hela iha Timor buat hotu la’o di’ak, ami hein katak 2027 bele hasoru malu timoroan sira iha Jornada Juventude Katólika iha Koreia Súl,” nia akresenta.
Notísia relevante : Don Virgílio : Prezensa Krús Joven iha Timor-Leste hametin fiar no unidade
Bainhira entrega filafali Krús Joven ne’e, sarani sira hamonu matan-been, ne’ebé hatudu sira-nia domin ba Jesus liuhusi Krús.
“Ha’u sente triste loos, tanba vizita Krús Joven no Illas Na’in-Feto ne’e durante loron hira hamutuk ho ami iha Bobonaru, husi nia hametin ami-nai fiar, hanorin ami oinsá sai joven ne’ebé di’ak, maski ohin nia fila ona maibé espíritu sei nafatin ho ami, buat hotu ne’ebé simu husi nia labele ko’ali ho liafuan, só bele deskobre de’it liuhusi matan-been,” Sarani, Fedeira dos Santos Amarál, hateten ba Ajénsia TATOLI, bainhira akompaña Krús Joven halo prosisaun ba Aeroportu Komoro.
Nia hato’o, “obrigadu Jesus ho krús ne’ebé mai ida-ne’e, hanorin ami oinsá sai joven ne’ebé di’ak liután no sai sarani ne’ebé fiar na’in, ita-boot nia prezensa hametin ami-nia fiar.”
Nune’e mós, Sarani, Sónio Ruak, hateten, nu’udar joven, nia parte orgullu simu Krús Joven Internasionál mai Timor-Leste, tanba Krús Joven ne’ebé Papa João Paulo II iha tempu ne’ebá oferese ba foin-sa’e sira iha mundu tomak, liuliu oinsá atu hametin fiar nu’udar Kristaun Katóliku.
“Prezensa krús ida-ne’e mai dala-rua ona, ha’u sente kontente tenba prezensa krús ne’e oinsá atu muda mentalidade joven sira-nian atu hametin fiar, oinsá ami hanesan joven bele kontribui buat di’ak ba nasaun ida-ne’e,” nia tenik.
Iha biban ne’e, Don Virgílio, husu ba joven sira atu kontinua estuda, hatudu hahalok di’ak, no kria unidade hodi dezenvolve nasaun ne’e ho di’ak.
“Tanba Krús Joven, nia presiza atu hametin fiar, sai joven tenke hatudu domin liuhusi haraik-an no kria dame iha nasaun ne’e,” nia tenik.
Jornalsita : Arminda Fonseca
Editora : Julia Chatarina
