OEKUSI, 02 Setembru 2025 (TATOLI) – Gabinete Prezidente Autoridade Rejiaun Administrativa Espesiál Oekusi Ambeno (RAEOA) liuhusi Asesória Asuntu Sosiál, lideradu Agustinho Caet, tersa ne’e, organiza komunidade uma-kain 30 iha aldeia Naetuna suku Abani sub-rejiaun Pássabe, hadi’a rasik estrada kuaze kilometru ida (1) husi estrada bo’ot tama ba sira-nia hela fatin hodi bele asesu atu transporta produtu lokál ba merkadu.
Notísia relevante:Paulino Marques husu Autoridade RAEOA prioriza estrada iha Pássabe
Tanba ne’e, Asesór Asuntu Sosiál, Agustinho Caet esplika katak inisiátiva ne’e nesesáriu, nune’e Gabinete Prezidente Autoridade liuhusi serbisu sosiál apoia nesesidade bázika nu’udar motivasaun atu hamutuk bele kontinua hadi’a estrada rurál sira iha bairru no aldeia.
“Ohin Ekipa Gabinete PA RAEOA, liuhusi Asesoria Asuntu Sosias apoiu ai-han ba família hamutuk uma-kain 30 iha aldeia Naituna, Suku Abani, ne’ebé hala’o serbisu sosiál hadi’a estrada rurál ba sira-nia knua. Inisiativa ne’e mai husi komunidade sira iha aldeia refere. Objetivu husi atividade sosiál ne’e mak atu motiva komunidade sira partidipa ativimante iha prosesu dezenvolvimentu área rurál, no mós atu promove unidade iha baze,” Agustinho Caet, iha suku Abani dehan, ohin.
Inisiativa ne’e, hetan apoia másima husi Asesór Asuntu Sosiál, hodi organiza komunidade sira iha baze hodi kontribui ba dezenvolvimentu –importante tebes atu garante sustentabilidade, tanba komunidade sira sente na’in ba obra ne’e no sei kuida ho di’ak ba tempu-naruk.
“Ida-ne’e nu’udar polítika ka programa prioridade Autoridade RAEOA, liuhusi Asesória Asuntu Sosias nian, entaun ita sei kontinua habelar ba suku sira seluk ne’ebé presiza tebes hadi’a estrada asesu ba sira-nia knua. Maski Autoridade halo ona esforsu reabilita estrada prinsipál sira, maibé seidauk tama to’o bairru no aldeia sira, entaun ita sei kontinua organiza komunidade sira iha baze hodi kontribui ativamente ba prosesu dezenvolvimentu. Ida-ne’e mós bele kontribui ba hametin paz no estabilidade iha baze,” nia katak.
Notísia relevante:Kompañia Asistono ho CP kontinua reabilita estrada rurál iha Pássabe
Xefe aldeia Naetuna, António Sila, esplika, inisiativa ne’e mai husi komunidade tanba besik udan monu rai, entaun iha bairru laran organiza malu hodi hadi’a rasik.
“Ida-ne’e ami mak hakarak rasik, depois mak ami husu apoia ruma husi Asesór Asuntu Sosiál, tanba iha estrada bo’ot, agora Governu hadi’a hela ho aterru, entaun iha bairru laran ami mós kontribui ho fuan, labele buat hotu ejize ba Governu, maibé nu’udar sidadaun ita mós tenke kontribui ba dezenvolvimentu, tanba ita rasik mak sei uza no asesu atu bele halo movimentu,” nia orgullu.
Jornalista: Abílio Elo Nini
Editór: Rafael Ximenes de A. Belo
