DILI, 12 Setembru 2025 (TATOLI)— Kónsul Jerál Timor-Leste iha Bali, Carolina Maria da Silva, informa katak udan ne’ebé hamosu inundasaun iha Bali la afeta ba timoroan sira ne’ebé hala’o estudu no serbisu iha Bali.
Nia dehan durante inundasaun ne’e laiha informasaun ka dadus ruma hatudu timoroan balun sai vítima ba katástrofe ne’e.
“Kondisaun timoroan ne’ebé hela iha ne’e di’ak hotu. Atu dehan de’it katak timoroan ne’ebé atu mai hela iha Bali tenke hetan vistu serbisu”, Carolina Maria da Silva dehan ba Tatoli via telefone.
Relasiona ho situasaun ne’e, nu’udar kónsul nafatin alerta ba timoroan sira, liuliu estudante sira ne’ebé hela iha Bali atu kuidadu an, no nafatin kontaktu ho kónsul bainhira akontese buat ruma.
“Daudaun iha Depansar Bali, Governu lokál halo esforsu másimu hahú horisehik kedas hamoos fali fatin sira akontese inundasaun hanesan estrada. Situasaun la’o normál, maibé iha edifísiu inklui universidade balun mak bee tama, entaun daudaun hamoos hela, espera segunda atividade hotu la’o normál”, nia dehan.
Nia haktuir kronolojia akontese udan to’o hamosu inundasaun, tanba udan ne’ebé tau iha loron 09 Setembru, ih tuku 11h00 dadersán to’o fali loron 10 Setembru tuku 5h00 madrugada hodi kauza katástrofe.
Notísia relevante: Timor-Leste fó doasaun millaun $2,5 ba inundasaun iha Bali
Jornalista : Arminda Fonseca
Editora : Maria Auxiliadora
