KOVALIMA, 15 Setembru 2025 (TATOLI) – Diretór Servisu Munisípiu Agrikultura Kovalima, Lino Magno, informa, tratór unidade lima ne’ebé daudaun ne’e iha sentru manutensaun tama ona iha lista leilaun tanba kondisaun grave.
“Tuir dadus tratór iha munisípiu Kovalima hamutuk unidade 31. Husi númeru ne’e tratór unidade 26 mak halo jestaun hodi fila komunidade sira-nia natar ho gratuita no tratór unidade lima tama ona lista leilaun,” Lino Magno informa dadus ne’e ba jornalista sira iha Safuk.
Dirijente ne’e dehan, kondisaun tratór unidade lima ne’ebé tama lista leilaun, tanba labele halo ona manutensaun no Ministériu Agrikultura, Pekuária, Peska no Floresta (MAPPF) sosa ona tratór foun unidade 25, nune’e hein de’it ona atu distribui mai iha Kovalima.
Ho nune’e, SMA Kovalima halo jestaun tratór ho unidade 26 hodi halo kolokasaun ba postu administrativu Zumalai, Maukatar, Suai no Tilomar fasilita komunidade sira atu fila komunidade sira-nia to’os ho gratuita.
Husi parte Ministériu Agrikultura, Pekuária, Peska no Floresta oferese mina gratuita atu fila komunidade nia to’os, maibé atividade no orsamentu mai husi Diresaun Nasionál Ministériu Agrikultura, Peska, Pekuária no floresta.
“Ita iha munisípiu servisu haree de’it ba área téknika hodi hamutuk ho MAPPF ne’ebé prepara konvustivél gratuita,” nia dehan.
Fó hanoin fali katak, Xefe Brigada sentru Tratór Kovalima Tomás Amaral informa, daudaun ne’e halo atendimentu halo rejistu komunidade sira atu fila sira-nia to’os ho gratuita provizóriu hamutuk ema na’in-50 ona, maibé kontinua halo atendimentu ba toos na’in-sira ne’ebe mak halo rejistu atu fila sira-nia to’os ho gratuita.
Jornalista: Celestina Teles
Editór: Evaristo Soares Martins
