VIKEKE, 19 Setembru 2025 (TATOLI)–Komunidade husi Aldeia Ossokaiua, Suku Afalokai, Postu Administrativu Uatulari, Munisípiu Vikeke, ne’ebé lokaliza iha foho matebian, hamutuk uma-kain 30 daudaun ne’e asesu ona enerjia eletrisidade.
Abitante Ossokaiua, Armindo Soares haktuir populasaun ne’ebé hela iha Aldeia Ossokaiua durante tinan naruk moris izoladu, la asesu ba enerjia eletrisidade.
“Iha tinan 2025 ne’e, Governu liuhusi Eletrisidade de Timor-Leste, Empreza Públika (EDTL, E.P.), tau-matan ona ami hodi dada eletrisidade ba ami. Ida-ne’e ami sente sorte boot tebes tanba asesu ona eletrisidade,” Armindo Soares ba TATOLI iha Aldeia Ossokaiua, Sesta ne’e.
Tuir nia katak eletrisidade ne’ebé naroman ona ne’e sei benefísia tebes populasaun no estudante sira tanba iha tempu kalan sira la presiza ona tuku kamii hodi asesu ba naroman.
“Ho ida-ne’e ha’u lori populasaun nia naran hakarak hato’o agradesimentu ba Governu ne’ebé lori ona naroman ba ami,” nia hato’o.
Tuir dadus, populasaun hela iha Ossokaiua foho ho totál uma-kain 30-resin, abitante hamutuk na’in-100 resin ne’ebé sai benefisiáriu ba enerjia eletrisidade.
Iha fatin hanesan, reprezentante Gabinete Inspesaun EDTL, E.P, Teodoro de Almeida Fernandes hateten projetu eletrifikasaun pakote tinan 2025 ida iha Aldeia Ossokaiua no Dasu-Uati nian, parte Ossokaiuai empreza responsavel konkluidu ona instalasaun ba uma-kain sia, enkuantu ba aldeia Dasu-Uati mak seidauk konkluidu.
“Nune’e ohin ami halo lakan uluk parte Ossokaiua nian atu populasaun sira asesu daudaun ona eletrisdiade, atu motiva mós ba ita-nia empreza servisu badinas, depoiz ita-nia empreza sira sei kontinua servisu ba área Dasu-Uati nian ne’ebé seidauk hotu. Obra ida-ne’e kle’ur liu to’o fulan-Dezembru tinan ne’e populasaun ba parte Dasu-Uati nian mós sira asesu asesu ona enerjia eletrisidade,” nia hato’o.
Projetu eletrifikasaun husi EDTL, E.P. bazeia ba kontratu nú: 017/WK/EDTL-EP-2025 ho totál orsamentu hamutuk $272.074,21, responsabiliza husi Empreza EKdepurmaloi Unip, Lda no JV RufiloSarmar 11 Unip, Lda.
Jornalista: Vitorino Lopez da Costa
Editór: Xisto Freitas da Piedade
