DILI, 22 Setembru (TATOLI)—Sekretária Estadu Formasaun Profisionál no Empregu (SEFOPE) daudaun ne’e rejistu ona kandidatu ne’ebé aplika ba vaga online Empregadór Seasonal Rekoñesidu (RSE) bá Nova Zelandia hamutuk 21.000, no daudaun ne’e iha hela faze verifikasaun dadus (Screanning).
Notísia Relevante: Vaga RSE Nova Zelandia la fó impaktu ba aplikante sistema PALM Austrália
Xefe Departamentu Reintegrasaun Estranjeiru, Alarico Fernandes, hateten kona-ba vaga Empregadór Seasonal Rekoñesidu (RSE) totál kandidatu hamutuk 21.000 no daudaun ne’e iha hela faze verifikasaun dadus (Screanning).
“Signifika katak ita seidauk bele deteta lolos husi totál kandidatu sira ne’e kompostu husi feto hira no mane hira, inklui mos sira ne’ebé aplika tuir email tamba naran iha ona sistema Pacific Australia Labour Mobility (PALM) nian,” Xefe Departamentu Reintegrasaun Estranjeiru, Alarico Fernandes, informa ba Agência Tatoli liuhusi telefónika, ohin.
Nia haktuir, kona-ba prosesu atu publika kandidatu sira-nia naran ne’e seidauk tanba sei hein matadalan ida no presiza aprova husi Sekretáriu Estadu Formasaun Profisionál no Empregu, hafoin ne’e mak bele publika ba públiku.
Antes ne’e, Diretór Diresaun Nasionál Empregu Estranjéiru SEFOPE, João Correia Pereira, hateten Programa RSE ba Nova Zelándia estabelese atu fó apoiu ba nesesidade traballadór seasonál sira iha indústria, ortikultura no vitikultura Nova Zelándia nian, enkuantu mós fornese oportunidade empregu temporáriu ba traballadór sira husi nasaun parseiru illa Pasífiku sira no mós Timor-Leste.
“Nune’e, ami enkoraja tebes ita-boot sira atu lee didi’ak informasaun no rekezitu sira hotu molok hahú íta-boot nia aplikasaun. Ida-ne’e sei ajuda asegura katak ita-boot komprende kritériu elejibilidade nian no iha dokumentu suporta hotu-hotu ne’ebé prontu ona,” nia dehan.
Iha oportunidade ne’e, nia husu ba aplikante sira atu haree kritéria ho didi’ak antes manda aplikasaun ba vaga online tuir tempu ne’ebé termina ona.
“Ami enkoraja no husu ita-boot sira iha vontade atu rejistu mós iha programa RSE bele haruka karta espresaun interese ida liuhusi aplikasaun e-mail no husu atu pasiénsia no koko fila-fali, bainhira halo rejistrasaun online ba iha sistema programa RSE. Link ne’ebé ita-boot sira asesu ba, iha problema ka la’o neineik (loading) ho razaun ba aplikasaun iha nia limitasaun ba asesu,” nia hateten.
Notísia Relevante: SEFOPE hahú anúnsiu vaga online ba joven sira servisu iha Nova Zelandia
Jornalista : Alexandra da Costa
Editór : Cancio Ximenes
