DILI, 22 Setembru 2025 (TATOLI)—Ekipa Selesaun Nasionál Futsál Timor-Leste (TL) derrota ho uma-na’in Kirzikistaun bainhira hala’o jogu dahuluk Grupu F kualifikasaun Asian Football Confederation (AFC) Futsál Asian Cup 2026.
Jogu entre ekipa nasionál Kirzikistaun kontra Timor-Leste hala’o iha KFS, Bishkek, loron-22 Setembru ho rezultadu ikus 9-1.
Selesaun Nasionál Kirzikistaun lidera golu 6-1 iha primeira parte liuhosi jogadór sira hanesan Shokhrukh Makhmadaminov, Murzakulov, Maksat Alimov, Donierbek Amanbaev no golu rua husi Makhmadaminov.
Notísia relevante: Kualifikasaun Tasa Ázia Futsál AFC 2026, Timor-Leste kontra Kirgizistaun
Repúblika Kirzikistaun kontinua domina jogu iha segunda parte iha-ne’ebé enxe husi jogadór sira hanesan Kubanychov, Murzakulov no Amanbaev hodi kompleta tan golu tolu no taka jogu ho rezultadu ikus 9-1.
Ho jogu referidu rezulta tabela Grupu F lidera husi Kirzikistaun ho pontu tolu (3), Palestina pontu tolu (3) hafoin manán Uzbekistaun 7-1, enkuantu Uzbekistaun iha pozisaun datoluk no Timor-Leste iha zona mean ho pontu 0.
Tuir oráriu, jogu Grupu F, Timor-Leste sei kontinua hala’o jogu kontra Uzbekistaun iha loron-22 Setembru no jogu ikus kontra Palestina iha loron-24 Setembru.
Entretantu, Kompetisaun AFC Futsál Asian Cup 2026 sei iha faze kualifikasaun ne’ebé kompete husi nasaun 31 fahé ba grupu A to’o H no Timor-Leste rasik kolokadu iha Grupu F hamutuk ho nasaun tolu seluk hanesan Kizikistaun nu’udár uma-na’in, Uzbekistaun no Palestina.
Jornalista: Natalino Belo
Editór: Xisto Freitas da Piedade
