Jo Hersey: Papél TVET importante liga foinsa’e Timor-Leste ba oportunidade globál
DILI, 15 Setembru 2025 (TATOLI) – Ministra Edukasaun no Formasaun Territóriu Norte Austrália, Jo Hersey, subliña katak Edukasaun no Formasaun Téknika no Profisionál (TVET, sigla inglés) nia papél importante tebes atu prepara foinsa’e hamosu poténsia ba iha indústria globál.
Ministra hato’o nia apresiasaun ba Governu Timor-Leste, bele konvida sira hodi partisipa iha eventu ne’e, tanba iha istória naruk kona-ba amizade, respeitu, no kooperasaun entre Austrália no Timor-Leste.
Nia destaka katak kuaze dois tersu husi populasaun Timor-Leste nian ho tinan 30 mai kraik, ida-ne’e halo juventude sai forsa boot nasaun nian ne’ebé presiza atu haburas liuhusi edukasaun vokasionál ho kualidade.
“TVET liga potensiál juventude nian ba prosperidade nasionál. TVET transforma aprendizajen ba meius subsisténsia nian, ekipa joven sira ho abilidade sira hodi hetan empregu ne’ebé signifikativu, kontribui ba sira-nia komunidade, no kompete iha ekonomia globál”, Jo Hersey dehan bainhira lori temátiku “Futuru Formasaun Profisionál no Edukasaun Globál Integrasaun” iha Semana Abilidade Internasionál ba daruak iha Sentru Konvensaun Dili (CCD).
Nia hatutan katak ko’alia kona-ba TVET, abilidade sira iha agrikultura, konstrusaun, eletroteknolojia, no indústria moderna sei garante Timor-Leste nia juventude iha ligasaun ba oportunidade nasionál no internasionál sira.
Nia mós subliña atu apoia joven Timor-Leste atu hetan oportunidade globál mak papél parseria internasionál sira-nian, liuliu Austrália iha ne’e delegasaun Territóriu Norte nian marka prezensa hamutuk ho reprezentante sira husi Universidade Charles Darwin, Technical and Further Education (TAFE), no organizasaun formasaun privadu sira hodi fahe esperiénsia sira indústria no negósiu nian.
Nia salienta Austrália iha nia programa kona-ba formasaun kuidadu ba idozu sira, ne’ebé akreditada no Austrália nia Eskema Mobilidade Traballu Pasífiku nian, hanesan ezemplu sira kona-ba oinsá edukasaun vokasionál kria dalan loloos ba foinsa’e sira no fó benefísiu ba komunidade.
“Programa sira ne’e hanesan ponte ida atu hametin lasu entre ema ho ema no nasaun sira harii kapasidade profisionál ba futuru. Hahú husi abilidade sira no enerjia ba ambiente no seguransa komunitária, inisiativa sira ne’e idaidak halo parte iha ami-nia kompromisu hodi prepara joven sira Timor-Leste ba empregu no lideransa ne’ebé signifikativu”, nia hatete.
Governante ne’e fiar katak edukasaun profisionál la’ós de’it kona-ba abilidade serbisu nian, maibé mós kona-ba esperansa, fiar-an, dignidade, no moris-di’ak.
Nia hatutan Territóriu Norte komprometidu atu aprofunda ninia parseria ba tempu naruk ho Timor-Leste, hodi estabelese enkuadramentu kolaborativu ida ba dezenvolvimentu forsa traballu no oportunidade ekonómika sira ne’ebé sei fó benefísiu ba nasaun rua no jerasaun sira iha futuru.
Notísia relevante: Semana Abilidade Internasionál 2025: Impulsiona inovasaun ba integrasaun globál
Jornalista: Arminda Fonseca
Editora: Maria Auxiliadora
