DILI, 22 Setembru 2025 (TATOLI)—Institutu Superiór Kristál (ISC-sigla portugeza), Segunda ne’e, realiza semináriu internasionál ho tema “Harii Kapasidade Profesór nian kona-ba Dezeña Avaliasaun: Dezenvolve Avaliasaun ho Kualidade Aas ne’ebé Hatán ba Ezijénsia Indústria nian”, atu oinsá koñese realidade merkadu traballu iha Timor-Leste.
“Tópiku ida-ne’e interesante tebes ba ami fakuldade edukasaun. Ami-nia graduadu sira bele sai profesór ka dosente ida-ne’ebé di’ak no kualidade oinsá sira bele koñese realidade merkadu servisu nian,” Prezidente Komisaun Organizadora, Zelio da Conceição Freitas hateten ba jornalista sira iha Salaun Katedrál, Segunda ne’e.
Nia dehan programa ba dahuluk iha fakuldade edukasaun, nune’e ba fulan oin sei hala’o fali ba fakuldade saúde.
Prezidente Komisaun ne’e akresenta matéria ba semináriu refere ko’alia kona-ba oinsá atu halo avaliasaun, oinsá bele halo assessment sira kona-ba kurríkulu.
Nia dehan orsamentu ba semináriu referidu ho montante $14.750, no orsamentu ne’e rasik mai husi subvensaun públika ne’ebé MESSK fasilita.
Iha fatin hanesan, Ministru Ensinu Superiór, Siénsia no Kultura, José Honório konsidera tema ba semináriu refere importante tebes atubele halo avaliasaun ba kursu sira.
“Ita haree tema ida-ne’e importante tebes, atubele halo avaliasaun ba ita-nia kursu. Ita la’o to’o ona iha-ne’ebé no haree ita-nia kurríkulu sira hakat to’o ne’ebé,” Jose Honorio informa.
Tuir nia katak rekursu umanu importante tebes, tanba ne’e liuhusi semináriu referidu bele reforsa dosente sira-nia kapasidade hodi halo konsepsaun ba avaliasaun.
Nune’e mós, Reitór Institutu Kristál, Sebastião Pereira agradese ba MESSK ne’ebé nafatin apoiu subvensaun públika hodibele realiza atividade referida.
“Apoiu no kolaborasaun husi Ministériu Ensinu Superiór, Siénsia no Kultura esensiál ba implementasaun inisiativa sira hanesan ida-ne’e, ne’ebé hakarak atu enrikese esperiénsia akadémika no promove eselénsia iha avaliasaun, peskiza no inovasaun,” nia subliña.
Aleinde ne’e, Prezidente Ezekutivu Fundasaun Kristál, Agostinho dos Santos Gonçalves hateten tópiku ne’e destaka urjénsia atu hametin formasaun akadémika.
“Topiku ne’ebé destaka, importante ba ita fakuldade nia kompeténsia pedagójika, formasaun akadémika ho alijénsia nesesidade loloos sosiedade nian no merkadu traballu nian,” nia tenik.
Nia akresenta tópiku ne’e sei kobre husi kurríkulu no sistema avaliasaun nian to’o pratika atuál sira ho kontribuisaun sira-ne’ebé hasa’e kualidade ensinu superiór nian iha nasaun.
“Tanba ne’e, ha’u enkoraja maka’as fakuldade hotu-hotu atu partisipa ho ativu to’o semináriu ida-ne’e ramata, hodi aproveita sesaun idak-idak nu’udár oportunidade ba kreximentu akadémiku no profisionál,” nia hakotu.
Oradór prinsipál husi semináriu referidu hamutuk na’in-haat, kompostu husi oradór internasionál na’in-rua hanesan, Prof. Dr. Hazman Shah V. B Abdhul, Assoc. Prof. Saida Ulfa, ST., M.Edu., Phd no oradór nasionál na’in-rua hanesan Mr. Edmundo Viegas, Phd no Prof. H. C. Dr. Augusto da Costa.
Jornalista: Osória Marques
Editór: Xisto Freitas da Piedade
