AINARU, 27 Setembru 2025 (TATOLI)–Komunidade uma-kain 346 husi Suku Fatubesi, Postu Administrativu Maubisse, Munisípiu Ainaru dezde ukun aan to’o agora seidauk bele asesu ba bee-moos.
“Iha ha’u-nia Suku Faubesi ha’u sente triste tanba dezde ukun aan to’o agora ha’u-nia komunidade seidauk asesu bee-moos. Hanesan autoridade suku sente triste tebes,” Xefe Suku Fatubesi, Bonifacio Mendoça hateten iha Sede Suku Maubisse, Sábadu ne’e.
Relasiona ho asuntu ne’e, nia dehan, kada tinan nia sempre hato’o proposta ba Empreza Públika Bee Timor-Leste (BTL) maibé to’o agora seidauk iha resposta pozitiva ba proposta ne’ebé mak hatama.
“Ami hatama proposta barak ona to’o agora seidauk hetan resposta pozitiva. Tinan ne’e ami kontinua hatama proposta balun liuhusi programa planu munisipál nian submete ona bá iha nasionál, maibé seidauk iha resposta,” nia haktuir.
Aleinde ne’e, Bonifacio tenik, difikuldade seluk ne’ebé komunidade hasoru mak kondisaun estrada ne’ebé aat tebes.
“Ha’u nia suku la’ós de’it halerik ba bee-moos, maibé kondisaun estrada mós grave difikulta komunidade transporta produtu mai merkadu. Ida-ne’e ami husu ba Governu bá-oin tau importánsia ba problema sira-ne’e, tanba Governu ida-ne’e promote ona katak sei tau importánsia ba infraestrutura hanesan estrada, bee-moos no eletridade sira iha área remota molok mandatu ramata,” nia informa.
Suku Fatubesi rasik iha aldeia neen mak hanesan Aldeia Hohulu, Tutu-Fili, Raebutilau, Kasimhei, Kaetalo no Titibauria, ho nia populasaun hamutuk 1.464 no uma-kain 346.
Iha fatin hanesan, Prezidente Autoridade Munisípiu Ainaru, Manuela Carmo Bucar Corte-Real hateten kona-ba difikuldade hirak-ne’ebé iha Suku Fatubesi tau ona iha prioridade orsamentu 2026.
“Difikuldade iha Suku Fatubesi ita tau ona ba prioridade,” nia adianta.
Jornalista: Arminda Fonseca
Editór: Xisto Freitas da Piedade
