DILI, 29 Setembru 2025 (TATOLI)—Komisaun Organizadora Liga kontinua loke rejistrasaun ba klube futeból sira antes realiza kompetisaun primeira divizaun Liga Futeból Famininu Timor-Leste (LFFTL).
Koordenadór Jerál LFFTL, Janio Tilman esplika Komisaun Organizadora informa ona ba klube sanulu (10) atu halo rejistrasaun ba lista jogadora sira maibé to’o agora ekipa ualu (8) mak finaliza ona, enkuantu rua seluk seidauk submete rejistrasaun nune’e kompetisaun LFFTL sei halo adiamentu.
“Ami kontinua hein. Falta klube rua mak seidauk halo rejistrasaun,” Koordenadór Jerál LFFTL informa ba TATOLI iha ninia kna’ar fatin, Bairros dos Grilos, Segunda ne’e.
Tilman relata Komisaun Organizadora halo ona enkontru ho responsavel klube hafoin jogu faze apuramentu ramata hodi kontinua halo rejistrasaun ba jogadora husi kada klube.
Komisaun Organizadora primeira divizaun LFFTL hahú loke rejistrasaun dezde fulan-Jullu no tuir planu ramata iha fulan-Agostu maibé klube rua mak seidauk halo rejistrasaun, iha-ne’ebé posibilidade difikulta iha jogadora.
“Ami seidauk fó serteja bainhira mak abertura tanba klube sira seidauk halo rejistrasaun,” Diretór Dezenvolvimentu, Parseria no Administrasaun Federasaun Futeból Timor-Leste (FFTL) ne’e akresenta.
Tilman argumenta importante tebes klube sira halo rejistrasaun jogadora hodi antesipa mosu dezentendimentu entre klube relasiona naran jogadora dupla iha klube no hamosu polémika bainhira hahú kompetisaun LFFTL.
Komisaun organizadora kontinua husu ba klube sira atu kumpre karta informativa hodi submete lista jogadora nune’e bele kontinua reuniaun téknika antes hahú kompetisaun iha tempu badak.
Entertantu, klube sanulu ne’ebé sei kompete iha primeira divizaun mak hanesan Buibere FC, AD-SLB, S’amuser FC, Maranatha FC, FC Kulugisa, Akadémika FC, UNITAL FC, Maudoko FC, VDL FC no Na’in-Feto FC.
Jornalista: Natalino Belo
Editór: Xisto Freitas da Piedade
