DILI, 02 Outobru 2025 (TATOLI)—Autoridade Ermera liuhusi Xefe Suku Seloi Kraik no Suku Malere husu Ministériu Obra Públika atu troka kompañia haat ne’ebé abndona servisu implementa projetu reabilitasaun estrada haleu Lagoa iha Suku Seloi, Postu Administrativa Aileu Villa, Munisípiu Aileu.
Notísia Relevante: Xefe suku Seloi Kra’ik preokupa estrada aat
Xefe suku Malere, António dos Santos Loco, hateten objetivu husi sira-nia prezensa iha ne’e hakarak marka audiénsia ho Ministru Obra Públika hodi ko’alia kona-ba projetu reabilitasaun estrada haleu Lagoa Seloi iha Suku Seloi Kraik no suku Malere nian, ne’ebé to’o agora kompañia Saksaur Lda, LNG Lda, Caviq Lda no Mortiles Lda, ne’ebé abandona servisu durante tinan neen ona hahú husi 2019 to’o 2025.
“Ami mai reprezenta komunidade iha suku rua ne’e, tanba tuir ami-nia haree kompañia sira-ne’e lahatudu sira-nia seriedade servisu no la fó rezultadu husi progresu projetu ne’e rasik,” xefe suku ne’e informa ba jornalista sira iha edifísiu MOP, Kaikoli, ohin.
Líder komunitária ne’e dehan, tanba impaktu ba sira mak difikulta movimentu iha tempu udan tanba rai ne’e mean, entaun namdoras no iha tempu bailoro halo rai-rahun maka’as bele fó moras ba komunidade.
Enkuantu, sira mós lahatene motiva saida mak kompañia sira abandona projetu ne’e, entaun marka audiénsia ne’e atu hatene loloos razaun kompania sira-nian tanba sira mós halo koordenadaun ho Prezidente Autoridade Munisípiu Aileu, no hateten projetu ne’e la’ós husi munisípiu maibé destaka husi nasionál.
“Ami hakarak hato’o problema ne’e para ministéria relevante bele foti desizaun troka tiha kompañia hirak ne’e, tanba tinan neen (5) maske halo ona drainajen balun, penahan no ateru ona dalan,” nia dehan.
Aleinde, nia hatutan, kestaun seluk mak kompañia balun ba deve tan komunidade, na’in lima sira-nia osan $200 to’o $400 no la selu osan ba uma-na’in ne’ebé sira aluga fatin tau ekipamentu projetu nian.
“Kompañia sira lori ekipamentus sa nonok de’it la fó informasaun ruma ba uma-na’in, no sira mós la selu sasán sira-ne’ebé deve iha kioské sira,” nia hateten.
Nia afirma, bazeia ba sira-nia observasaun laiha kompañia ida mak halo movimentu servisu iha terrenu no kompañia ida Cavic Lda mak daudaun ne’e kontinua reabilita hela ponte iha lagoa Seloi.
Kansela kompañia presiza fó notifikasaun tuir dalan legál
Entretantu, Ministru Obra Públika, Samuel Marcñçal, hateten prosesu halo kanselamentu ba kompañia ne’ebé laiha seriedade ba servisu la’ós fasíl maibé presiza fó notifikasaun dahuluk tuir dalan legál.
Ministru Obra Públika, Samuel Marçal, hateten projetu ne nia durasaun la’ós tinan neen ona, kontratu iha tinan 2020 iha Governu anteriór nian, ne’ebé servisu lala’o tanba situasaun COVID-19, nune’e kompañia sira hahú implementa fali iha mandatu Governu Konstitusionál da-sia (IX) nian.
“Maibé loos duni iha projetu reabilitasaun estrada haleu Lagoa Seloi ne’e iha problema duni ho kompañia ne’e no ha’u bolu ona kompañia, sira halo enkontru hodi ajuda sira maske sira lakohi kapasita sira-nia an,” Ministru ne’e informa ba jornalista hodi hatán ba komunidade Seloi nia preokupasaun kona-ba atu troka kompañia haat ne’ebé la sériu halo servisu, iha Parlamentu Nasionál, ohin.
Nia hatutan, nia sei iha kompeténsia foti medida halo kanselamentu ba kompañia sira-ne’ebé laiha seriedade servisu ne’ebé Governu fó ona ba sira. Maibé prosesu ne’e la’ós fasíl para troka kedas agora, entaun ita presiza investiga no fó notifikasaun dala-tolu foin bele halo kanselamentu.
“Tanba, problema ne’e kompañia sira hasoru ne’e barak tebes, balun tanba laiha kapasidade finansieru, kapasidade tékniku ne’ebe profisionál no mós problema sosiál,” nia esplika.
Enkuantu, kona-ba kestaun kompañia sira empresta komunidade nia osan ne’e nia laiha kompeténsia atu fó komentária, tanba ne’e privasidade ida-idak nian no nia só bele ko’alia bainhira ne’e relasiona ho programa Governu nian.
“Sira impresta malu nia osan ne’e rezolve tuir família ba, naran katak labele estraga malu,” nia dehan.
Notísia Relevante: MOP sei lansa fatuk dahuluk projetu reabilitasaun estrada Aileu-Lequidoe
Jornalista : Alexandra da Costa
Editór : Cancio Ximenes
