DILI, 03 Outubru 2025 (TATOLI) – Funsionáriu Parlamentu Nasionál (PN) na’in 11 hetan Sertifikadu nivel III iha Administrasaun Públika Jerál, liuhusi Programa Rekoñesimentu Kualifikasaun Anteriór.
Sertifikadu ida-ne’e hodi rekoñese esperiénsia profisionál funsionáriu sira ne’ebé serbisu signifikativu maski edukasaun formál limitadu.
Programa Rekoñesimentu Kualifikasaun Anteriór envolve série avaliasaun fulan lima, inklui rejistu, autoavaliasaun, entrevista, vizita iha fatin, no observasaun ba kandidatu sira-nia serbisu loroloron. Partisipante ida-lidak mós hatama dokumentu komprovativu sira hanesan CV no sertifikadu sira.
Reitór Institutu Teknolojia Dili (DIT), Salustiano dos Reis Piedade, subliña Programa Rekoñesimentu Kualifikasaun Anteriór importante no agradese ba Governu, liuhusi Institutu Nasionál Dezenvolvimentu Mão-de-obra (INDMO), tanba akredita ona DIT hanesan instituisaun únika ne’ebé oferese programa ne’e.
“Programa ida-ne’e hanesan pasu importante ida hodi rekoñese esperiénsia profisionál, hametin kapasidade, no dezenvolve jestaun rekursu umanu iha instituisaun sira-nia laran. Funsaun programa ne’e maka atu rekoñese sira ne’ebé, maski laiha ensinu superiór formál, maibé kontribui ona ba abilidade sira ne’ebé sira iha. Ida-ne’e dala uluk ami halo iha Timor-Leste, no DIT hetan rekoñesimentu hanesan sentru avaliasaun ida ba programa ne’e”, Salustiano dos Reis Piedade dehan, ohin.
Nia hatutan, nu’udar prova ba kompromisu DIT nian atu kolabora ho Parlamentu Nasionál, programa ne’e sei kontinua oferese bolsa estudu kuota tolu ba funsionáriu sira iha tinan 2026.
Diretora Ezekutiva INDMO, Isabel Fernandes de Lima, hato’o nia apresiasaun ba kolaborasaun ho Parlamentu Nasionál.
“Nu’udar órgaun reguladór, ita bele hahú rekoñese nesesidade formasaun funsionáriu sira-nian no rekoñese sira-nia kapasidade. Obrigadu ba DIT ne’ebé fornese ona fatin no kolabora hodi hala’o formasaun Administrasaun Jerál Públika”, Isabel hatete.
Prezidente Parlamentu Nasionál, Maria Fernanda Lay, entrega prémiu ba dezempeñu funsionáriu sira ne’ebé partisipa iha programa Rekoñesimentu Kualifikasaun Anteriór.
“Dezempeñu hosi ema na’in-11 ne’e hatudu ona katak maski sira laiha grau akadémiku sira, sira merese sertifikasaun. Ha’u hein katak ida-ne’e sei sai hanesan pasu dahuluk hodi implementa iha ministériu sira seluk”, nia hateten.
Sertifikadu nivel III iha Administrasaun Públika Jerál ne’ebé funsionáriu sira simu hanesan ho Diploma 2 no prepara sira atu hala’o knaar administrativu iha setór públiku.
Ida-ne’e inklui apoia jestór sira, maneja rutina administrativu sira, komunika ho públiku, jere dokumentasaun, no partisipa iha jestaun rekursu umanu no finanseiru ho supervizaun.
Funsionáriu sertifikadu na’in-11 hein atu hasa’e sira-nia dedikasaun no dezempeñu, enkuantu sai mós nu’udar modelu ba dezenvolvimentu kapasidade rekursu umanu iha setór públiku Timor-Leste nian.
Jornalista: Arminda Fonseca
Editora: Maria Auxiliadora
