KOVALIMA, 09 Outubru 2025 (TATOLI)-Ministru Administrasaun Estatál (MAE), Tomas do Rosário Cabral, kinta ne’e, halo abertura ba kompetisaun korrida kavalo, iha munisípiu Kovalima hodi harame festivál fronteira 2025.
Iha diskursu, Governante ne’e, fó hanoin ba autoridade sira husi munisípiu Kovalima, Bobonaro, RAEOA no seluk tan atu mantein kultura ida katak kompetisaun ne’e nu’udar desportu tradisionál ho objetivu atu hametin unidade no amizade durante festivál fronteira ne’e la’o.
“Iha eventu festivál fronteira ita-boot sira matein nafatin imi-nia kultura kompetisaun kuda halai taru tanba munisípiu seluk laiha maibé kompetisaun kuda halai taru iha de’it Kovalima,”Nia hateten iha kampu Suai Loro.
Kuda sira ne’ebé maka kompete iha serimónia abertura ne,e maka kuda ho klase B, C1 ho C2,D1,D2 no kuda ho kategória klase E. Kuda ho klase B tradisionál hamutuk kuda ualu, hanesan kuda amigu Fatumea, noi bonita Belu tasi mane, metan morena, country boy, tequila, tatoli, lemorai no kuda lokomeo.
Hosi klase C1 kompostu hosi kuda armada, araska boi, laloran no good boy, klase C2 maka country boy, fitun busi, lemorai, babuta no lokomeo.
Kuda hosi klase D1 mak armada na’in hoar, babuta, bonancha, kencana no sama rusa. Kuda klase D2 maka kuda heli metan, luna vermella, babulu, mali kiik no mesak.
Maibé hosi klase E iha race II hamutuk kuda lima maka hanesan hadomi, habulu, berek babuta, carasas no kuda lamikan.
Kuda ho klase E race V hamutuk neen maka kuda mesak, mali kiik, kobarde, lasakar, oelotu no makikit minarai.
Iha fatin hanesan, Cimplicio Gusmão Amaral sente kontente tanba bele kompete iha korrida kavalo festivál fronteira da-toluk ne’ebé maka hala’o iha munisípiu Kovalima.
“Ha’u kontente tanba ha’u mós bele tuir kompetisaun desportu kuda halai taru iha kampu Suai loro postu Suai, munisípiu Kovalima,”nia hateten.
Entertantu, eventu korrida kavalo realiza tanba organiza hosi Ministériu Juventude Desportu Arte no Kultura (MJDAK) ho objetivu hodi anima komunidade sira durante festivál fronteira ne’e.
Jornalista:Celestina Teles
Editór:Florencio Miranda Ximenes
