ATAÚRU, 11 Outubru 2025 (TATOLI)–Primeiru-Ministru, Xanana Gusmão inaugura uma rua ba rezidénsia profesór ne’ebé konstrui iha Vila Maumeta, Munisípiu Ataúru.
Rezidénsia rua ba profesór ne’e ho medida 15x 11 no medida 12 x 11, kompleta ho kuartu neen, sala vizita haat, varanda rua no hariis-fatin rua.
Uma ne’e konstrui ho Fundu Espesiál Dezenvolvimentu Ataúru hamutuk $150.614,94 no obra ne’e kaer husi empreza Fitun Galileia.
Ministru Administrasaun Estatál, Tomás do Rosário Cabral hateten reabilitasaun uma profesór sira-ne’e liuhusi Planu Dezenvolvimentu Integradu Munisípiu (PIDIM), nu’udár parte ida husi esforsu luan liu Governu nian atu hadi’a infraestrutura públika iha munisípiu sira.
Governante ne’e informa katak kompromisu Governu nian atu hadi’a kondisaun moris no servisu ba profesór sira ne’ebé destaka ba área remota.
“Ministériu Edukasaun fó ona servisu edukasaun ba munisípiu hotu-hotu inklui Ataúru. Profesór barak mak koloka husi munisípiu seluk hodi servisu iha-ne’e, no responsabilidade Governu nian atu fornese ba sira uma ne’ebé dignu nune’e sira bele moris konfortavel no hala’o kna’ar ho efetivu,” nia dehan.
Iha fatin hanesan, Prezidente Autoridade Munisípiu Ataúru, Mateus Belo hateten orsamentu ne’ebé prevee iha Fundu Espesiál Ataúru (FEDA) iha millaun $3 maibé halo ona buat barak.
Nia dehan, husi osan ne’e liuhusi PDIM loke estrada Munisípiu to’o área rurál, espera iha 2026 illa Ataúru estrada perkore ona.
Nia hatutan, husi programa PDIM Ataúru mós dada ahi eletrisidade hodi hakotu nakukun iha Ataúru.
Mateus Belo mós hateten liuhusi Fundu Espesiál Ataúru nian sei loke Sentru Saúde lima hodi fó asisténsia saúde di’ak liután ba komunidade, loke eskola pré-primária no ensinu báziku hamutuk 40.
Belo hatutan sei halo rezidénsia tolu ba médiku sira inklui konstrui tan rezidénsia haat ba profesór sira atu garante servisu ne’ebé di’ak ba komunidade.
Jornalista: Natalino Costa
Editór: Xisto Freitas da Piedade
