BOBONARU, 14 Outubru 202 (TATOLI) – Sekretariu Estadu Komunikasaun Sosiál (SEKOMS) hamutuk ho Konsellu Imprensa (CI, Sigla Portugés), liuhusi feira fotojornalizmu, tersa ne’e, introdús fotografia jornalizmu istoríku ba estudante Ensinu Sekundáriu Jerál (ESG) Filiál Dom Martinho da Costa Lopes, Postu Administrativu Balibo, Munisípiu Bobobaru, iha ámbitu komemorasaun loron trajédia “Balibo five” ba da-50
Prezidente Komisaun Organizadora, António Dias, informa katak husi feira ne’e atu partilla informasaun kona-ba istória no kontribuisaun jornalista sira-nian ba luta libertasaun nasionál.
Alende ne’e bele inspira foinsa’e sira nune’e ba futuru sai jornalista karik sira bele iha kredibilidade no sai lian ba lian-laek hanesan jornalista na’in-lima ne’ebé mate ho kruelidade iha trajédia Balibo 1975 no jornalista seluktan.
“Ita-nia jornalista na’in-lima ne’e halo ona, uainhira Timór laiha lian ona atu fó sai ba mundu tomak. Sira mai ajuda ita atu fó ita-nia lian ba mundu tomak. Sira hateten iha momentu ne’ebá, husi knu’a naran-laek Balibo agora Balibo nia naran boot iha mundu. Ida-ne’e mak feira foto jornalístiku ne’e atu inspira ita-nia estudante sira. Ita-nia alin estudante sira ne’e, sira mak iha futuru sei prezerva saida mak ita-nia avo, ita-nia lideransa sira halo, entaun sira tenke hatene istória sira ne’e halo didi’ak oinsá importánsia imprensa ninian ba ita-nia luta ukun rasik aan,” nia informa ba jornalista sira, iha kampu Futeból Balibo, ohin.
Notísia relevante:Prezidente sei halo abertura ba selebrasaun Balibo Five ba da-50 iha Bobonaru
Estudante ESG filiál Balibo, kontente tanba liuhusi feira ne’e sira bele hatene ho detallu kona-ba istória no kontribuisaun ne’ebé jornalista internasionál no nasionál sira halo ona iha situasaun difisil nia laran.
“Ami foin hatene jornalista sira ne’e mai husi ne’ebé saida mak sira halo iha monentu ne’ebá. Ami jerasaun foun presiza hatene istória liuliu istória Balibo tanba Balibo mak sai hanesan roman ba Timor-Leste,” nia dehan.
Hafoin ne’e Komisaun Organizadora mós lori estudante sira vizita fatin akontesimentu “Balibo Five” hodi esklarese istória ne’ebé loloos.
Enkuantu Komisaun Organizadora mós realiza feira produtu lokál ne’ebé servisu hamutuk ho Ministériu Komérsiu no Indústria hodi komemora loron mundiál alimentasaun ho objetivu atu promove produtu lokál no garantia soberania ai-han tanba la kle’ur tan Timor-leste adere ba membru plenu ASEAN ne’ebé presiza promove produtu bandeira Timor-leste nia iha merkadu ASEAN.
Notisía relevante:TL sei selebra “Balibo Five” ho “Liberdade imprensa ba lia-loos no justisa”
Jornalista: Sergio da Cruz
Editór:Rafael Ximenes de A. Belo
