DILI, 15 Outubru 2025 (TATOLI)—Primeiru-Ministru, Kay Rala Xanana Gusmao, deside hodi fó podér ba Ministru Justisa, Sérgio de Jesus Fernandes da Costa Hornai, hodi asina Tratadu Estradisaun ASEAN nian ba kombate krime transnasionál.
Tuir komunikadu imprensa ne’ebé públika iha portál Governu haktuir, instrumentu jurídiku ne’e ho objetivu atu reforsa kooperasaun jurídika entre Estadu-Membru ASEAN sira iha kombate krime transnasionál.
Normalmente tratadu ne’e estabelese prinsípiu no prosedimentu ba entrega resíproka husi ema sira-ne’ebé buka ba efeitu akuzasaun no julgamentu.
Aleinde ne’e mós refere ba kumprimentu pena, define infrasaun sira-ne’ebé sujeitu ba estradisaun, kondisaun obrigatóriu no diskrisionáriu sira, no fundamentu ba rekuza nomós garantia prosesuál no umanitária sira-ne’ebé aplikavel.
Jornalista : Alexandra da Costa
Editór : Cancio Ximenes
