DILI, 21 Outubru 2025 (TATOLI)—Ekipa Maudoko Football Club (FC) lidera provizoriamente jornada dahuluk primeiru divizaun Liga Futeból Femininu Timor-Leste (LFFTL).
Ekipa Maudoko FC iha pozisaun dahuluk hafoin manán ho skor boot 0-10 bainhira kontra Na’in-Feto FC ne’ebé realiza iha Estádiu Munisipál Dili, Segunda (20/10/2025).
Tuir tabela klasifikasaun, mezmu Maudoko rekolla pontu tolu (3) rezultadu jogu ida, maibé haree ba produtividade golu Serena Cs iha (±10) bainhira kompara ho AD SLB ne’ebé okupa pozisaun daruak ho golu (±9) bainhira manán UNITAL FC 9-0.
Aleinde ne’e, pozisaun datoluk okupa husi ekipa S’amuser FC ho pontu tolu hafoin gaña vitória 6-0 kontra Akadémika FC, enkuantu Buibere FC iha pozisaun dahaat tabela klasifikasaun ho pontu tolu (3) hafoin manán Maranatha ho skor 6-0.
VDL Fc ne’ebé foin promovidu ba primeira divizaun okupa iha pozisaun dalimak hafoin gaña pontu tolu (3) husi Kulugisa FC ne’ebé iha pozisaun daneen ho skor 4-0.
Entretantu, ekipa Maranatha iha pozisaun dahitu ho pontu 0, Akadémika FC iha pozisaun daualu no ekipa rua iha zona mean hanesan UNITAL FC no Na’in-Feto FC ne’ebé okupa iha dasiak no dasanuluk.
Jornalista: Natalino Belo
Editór: Xisto Freitas da Piedade
