DILI, 24 Outubru 2025 (TATOLI)-Autoridade Nasionál Minerál, Institutu Públiku (ANM, I.P) aprezenta rezultadu serbisu kona-ba dezenvolvimentu setór mineiru iha país ba Parlamentu Nasionál (PN).
Prezidente ANM, Rafael de Araújo, hateten nu’udar instituisaun foun no setór ne’e sai importante ba iha dezenvolvimentu ekonómiku, tanba tuir estudu, nasaun iha poténsia tebes hanesan osan-mean, manganés no seluk tan bainhira dezenvolve sei fó benefísiu barak.
Nia dehan, tinan ne’e, emite ona lisensa ambientál 46 no autorizasaun mineiru ba atividade esplorasaun fatuk no ra1ihenek iha territóriu no atividade prospesaun peskiza 43 la’o hela husi investidór internasonál, lokál no empreza estatál Murak Rai Timor.
“Benefísiu husi atividade mineiru, husi atividade investidór rejistu ona kompromisu husi investimentu pur volta millaun $15, agora sira gasta la’o hela iha rai-laran no rejista númeru empregu iha ema 1.200’’, nia hato’o iha ámbitu audiénsia ba proposta Orsamentu Jerál Estadu (OJE) 2026 ba Parlamentu, ohin.
Autoridade dezde Janeiru tinan ne’e rekolla ona reseita millaun $1,2 ba kofre Estadu. “Iha futuru setór mineiru bele kontribui liután reseita ba dezenvolvimentu ekonómiku’’, nia otimista.
Hodi salienta, iha tinan 2021, Kódigu Mineiru aprova iha PN fó ona oportunidade atu lansa programa promosaun no atrai investimentu iha área referida. Nune’e, iha tinan 2023, lansa ona konkursu públiku dahuluk ba bloku 42 ne’ebé daudaun investidór sira halo hela prospesaun no estudu.
ANM iha programa prioridade haat ba dezenvolvimentu instituisionál, dezenvolvimentu ekonómiku, peskiza no promosaun minerál no dezenvolve polítika no lei sira.
Nia relata ezekusaun OJE 2025 ANM nian atinje 70% husi montante inisiál millaun $4,5.
Ba tinan oin, ANM prevee millaun $4,9 hodi kontinua fó prioridade na dezenvolvimentu setór ne’e.
Jornalista: Nelson de Sousa
Editora: Maria Auxiladora
