DILI, 28 Outubru 2025 (TATOLI)–Kompetisaun Kopa Juvenil Sub-17 hahú tama iha faze meiu finál ne’ebé sei realiza iha Estádiu Munisipál Dili.
Kompetisaun entre klube husi munisípiu ne’ebé reprezenta husi kada rejionál sei kompete husi ekipa ualu kompostu mane haat no feto haat ne’ebé fahe ba faze tolu hanesan nivel munisipál, rejionál no sei kontinua iha nasionál hodi hadau kampiaun ba tinan 2025.
“Husu ba asosiasaun futeból sira atu organiza didi’ak ekipa sira-ne’ebé atu mai kompete iha nasionál. Labele manipula jogadór sira-nia dokumentu identidade,” Diretór Kompetisaun Eventu Federasaun Futeból Timor-Leste (FFTL), João Campos hateten liuhosi komunikadu ne’ebé TATOLI asesu, Tersa ne’e.
Notísia relevante: Klube ualu sei kompete Kopa Juvenil Sub-17 iha nasionál
Klube ualu ne’ebé sei kompete iha nasionál hanesan feto kompostu rejionál I husi Baukau sei kontra Aileu ne’ebé sai vensedór husi rejionál II, Ermera husi rejionál III sei kontra vensedór rejionál IV husi Asosiasaun Dili Leste ne’ebé sei kompete meiu finál iha Estádiu Munisipál Dili, 28 Outubru.
Ekipa haat seluk husi mane, parte rejionál I reprezenta husi Vikeke sei kontra vensedór rejionál II husi Manufahi, Ermera husi rejionál III sei hasoru vensedór rejionál IV husi Asosiasaun Dili Leste ne’ebé tuir kalendáriu sei kompete iha Estádiu Munisipál Dili, Kuarta (29/10/2025).
Parte Komisaun FFTL fó-sai husi rezultadu reuniaun téknika, ekipa ualu referidu iha meiu finál vensedór sei hakat bá finál, enkuantu rua seluk hadau terseiru lugár.
“Jogu ba nivel nasionál sei hahú iha loron 28 to’o 31 Outubru 2025,” João Campos akresenta.
Kompetisaun Kopa Sub-17 antes ne’e kompete liuhosi nivel munisipál hamutuk asosiasaun 13 kompostu Asosiasaun Futeból Dili Leste, Likisá, Ermera, Aileu, Bobonaru, Ainaru, Manufahi, Kovalima, Oekusi, Manatutu, Baukau, Lautein no Vikeke.
Husi rezultadu nivel munisipál, klube 26 kompostu mane 13 no feto 13 kompete iha nivel rejionál ne’ebé antes ne’e realiza jogu hanesan rejiaun I iha Estádiu Tadeu Laikana Baukau, Rejiaun II iha Manufahi, Rejiaun III iha Estádiu Munisipál Kafé, Ermera no Rejiaun IV iha Estádiu Malibaka Yamato Maliana.
Jornalista: Natalino Belo
Editór: Xisto Freitas da Piedade
