DILI, 01 Outubru 2025 (TATOLI)—Diretór Kompetisaun Eventu Federasaun Futeból Timor-Leste (FFTL), João Campos esplika klube ualu (8) sei kompete jogu Kopa Juvenil Sub-17 iha nasionál.
“Iha ekipa ualu husi mane haat no feto haat mak reprezenta kada rejionál mai kompete iha nivel nasionál,” Diretór Kompetisaun Eventu FFTL informa ba TATOLI iha ninia kna’ar fatin, Bairros dos Grilos, Kuarta ne’e.
Campos haktuir klube ualu ne’ebé reprezenta husi kada rejionál hanesan Rejiaun I Baukau feto ida no Vikeke mane ida, Rejiaun II Manufahi mane ida no Aileu feto ida, Rejiaun III Ermera mane ida ho feto ida no Rejiaun IV husi Dili Leste mane ida no feto ida.
Nia dehan ekipa ualu ne’e selesionadu hafoin sai vensedór jogu iha nivel munisipál no kontinua sai kampiaun iha nivel rejionál ne’ebé kada ekipa sei reprezenta husi Asosiasaun Futeból Munisípiu.
“Komisaun organizadora kontinua halo rejistrasaun no prepra antes kompete iha nasionál,” Campos informa.
Kompetisaun Kopa Sub-17 antes ne’e liuhosi nivel munisipál ne’ebé realiza iha kada munisípiu hamutuk Asosiasaun 13 kompostu Assosiasaun Futeból Dili Leste, Likisá, Ermera, Aileu, Bobonaru, Ainaru, Manufahi, Kovalima, Oekusi, Manatutu, Baukau, Lautein no Vikeke.
Husi rezultadu nivel munisipál, klube 26 kompostu mane 13 no feto 13 ramata ona kompete iha nivel rejionál ne’ebé antes ne’e realiza jogu hanesan Rejiaun I iha Estádiu Tadeu Laikana Baukau, Rejiaun II iha Manufahi, Rejiaun III iha Estádiu Munisipál Café Ermera no Rejiaun IV iha Estádiu Malibaka Yamato Maliana.
Nune’e, Federasaun Futeból Timor-Leste liuhosi komisaun organizadora deside ona kalendáriu ba realizasaun kompetisaun referida ho durasaun loron-tolu, hahú 27 to’o 30 Outubru.
“Kompetisaun ne’e sei hala’o loron-tolu ho sistema derrota ba meiu finál, buka terseiru lugár no finál,” diretór ne’e tenik.
Campos relata razaun deside loron referidu tanba hakarak kria kompetisaun ne’ebé kualidade, iha espasu atu klube sira submete dokumentu no identidade jogadór nian tanba maiória estudante ne’ebé tuir ezame nasionál.
Jogu Juvenil Sub-17 ne’e tuir planu sei realiza iha Estádiu Munisípiu Dili. Komisaun organizadora prepara prémiu hanesan tasa no medalla ba manán-na’in sira.
Jornalista: Natalino Belo
Editór: Xisto Freitas da Piedade
