DILI, 02 Novembru 2025 (TATOLI) – Don Virgílio Kardeál do Carmo da Silva, SDB, iha ninia omília iha misa selebrasaun loron matebian, hateten momentu ne’e nakonu ho esperansa, hodi konvida sarani hotu hasa’e orasaun ba Maromak atu matebian sira bele hetan fatin kmanek iha reinu lalehan.
Don Virgílio, dehan ohin tama ba domingu da-30, ho selebrasaun ne’e Santa Kreda konvida atu hanoin no harohan ba matebian sira.
“Entaun, ohin loron 02 fulan Novembru, selebra loron matebian sira nian, konvida ita hanoin ba Maromak, ba maluk sira ne’ebé husik ona mundu ne’e, ne’eduni loron ida ne’e sai duni nakonu ho esperansa, tanba Maromak nia domin buka imi manán rohan la’ek,” Arsebispu hato’o iha Santa Misa, iha Igreja Balíde, domingu ne’e.
Kardeál, dehan loron 01 Novembru Igreja no sarani komemora uluk ho loron Santu sira-nia no ohin ho selebrasaun loron matebian ida-ne’e dezeju harohan no iha leitura konvida oinsá prepara an no moris sai prezente ida ba Nai Maromak.
“Iha primeira leitura, ko’alia kona-ba moris tau ita hahí Maromak, prezensa lori ksolok ba fatin moris nian,” nia haktuir.
Nune’e evanjellu konvida harohan atu liberta sira husi sala hetan fatin rohan laek iha lalehan “Halo ita laran metin ba Jesus Kristu nia moris hikas, ba ita-nia resolisaun no moris foun. Hanesan São Paulo, dehan, ita fiar Jesus mate no moris hikas fali, Kristu nia mate no moris hias mak domin Maromak nian ba ita.”
“São Paulo dehan, esperansa ba kredo nia moris di’ak, ita hotu iha forma ida ne’ebé foun.”
Selebrasaun ne’e sarani sira ho domin hafoin hetan bensaun ba ai-funan no lilin hodi ba rate tau.
Jornalista: Nelson de Sousa
Editór: Evaristo Soares Martins
