AILEU, 06 Novembru (TATOLI)-Prezidente Repúblika, José Ramos-Horta, kinta ne’e, hala’o vizita bá idozu Sebastião Mausabo ne’ebé ho ninia atividade diária tuku besi hodi faan atu selu oan sira-nia eskola iha aldeia Kirilelo, suku Liurai, postu administrativu Aileu Vila, Minisípiu Aileu.
Xefe Estadu ninia vizita ne’e, ho objetivu atu hare besik liután kondisaun idozu ne’e ho família ne’ebé lor-loron tenke tuku besi hodi sustenta nesesidade uma-laran.
“Maibé pelu menus ba apa ne’ebé tuku besi hau promete ami buka mákina ida hosi Kupang ka Jakarta tulun nia atu tuku besi ne’e halo modernu uituan,” dehan Ramos-Horta iha Aileu.
José Ramos-Horta, relata iha primeiru-mandatu hanesan Prezidente Repúblika, fó ona apoiu orsamentu ba família ida ho atividade tuku besi hanesan no daudaun ne’e sira-ninia atividade dezenvolvidu ona.
Xefe Estadu mós husu ba Sebastião Mausabo nia-oan sira bele bá iha Gabinete Prezidente Repúblika hodi hetan apoiu.
Durante vizita ne’e, Xefe Estadu mós aproveita oportunidade hodi hare kondisaun moris populasaun iha fatin ne’ebá ne’ebé maioria ho atividade agrikultura hodi prodúz de’it produtu lokál hanesan talas, aifarina, koto moruk, hakiak animál ne’ebé la garante moris di’ak ba sidadaun.
“Iha tinan 2026 hanesan prioridade governu nian atu halo estrada nasionál no estrada rurál,” hateten Xefe Estadu.
Reprezentante Xefe Suku Liurai, Bendito Gomes, orgullu ho prezensa Xefe Estadu b’a iha suku ne’e hodi hare diretamente populasaun sira-nia moris iha.
“Hanesan Xefe suku orgullu ida ne’e primeira Prezidente Repúblika vizita suku Liurai haree kondisaun moris komunidade hanesan ema baibain, toos-na’in no idade avansadu ne’ebé esforsu tuku besi atu suporta família no oan sira bá eskola,”nia hateten.
Iha fatin hanesan Idozu Sebastião Mausabo, informa husi besi ne’ebé nia ho família tuku ba katana, aisuak no karau-dikur hodi faan atu hetan osan hodi sustenta família no selu oan-sira ninia eskola.
“Hau la’o atividade tuku besi Iha ne’e hanesan komuidade sira lori besi sira mai hau tuku no besi kiik sai ai-suak no karau dikur hetan netik 0,50 sentimu no 1 dollár to’o dollár 2 hodi suporta oan sira bá eskola,” nia relata
Iha okaziaun ne’e, Prezidente Repúblika, José Ramos-Horta fó apoiu kedas orsamentu ho montante purvolta $ 100 hodi selu idozu ninia oan-sira nia eskola.
Notisia relevante: PR apoia nesesidade bázika ba orfanatu Franciscana iha Viqueque
Jornalista : Francisco Sony
Editór : Florencio Miranda Ximenes
