DILI, 19 Novembru 2025 (TATOLI)—Organizasaun Mundiál Saúde (OMS) destaka progresu prevensaun ba kankru serviks reforsa vasinasaun no triajen, iha okaziaun Loron Internasionál ba Eliminasaun moras ne’ebé komemora iha loron 17 fulan-Novembru.
Reprezentante OMS iha Timor-Leste, Arvind Mathur hateten, iha komunikadu ne’ebé Tatoli asesu katak kankru serviks hanesan tipu kankru ida ne’ebé bele prevene liu, bainhira iha vasinasaun, triajen regulár, no tratamentu oportunu.
OMS estabelese alvu sira atu vasina 90% husi labarik-feto sira to’o tinan 15, halo triajen ba 70% hosi feto sira ho idade 35 to’o 45, no asegura katak 90% hosi feto sira ho lezaun pré-kankru ka kankru hetan tratamentu lalais.
“Timor-Leste foti ona pasu importante sira: vasina Human Papilomavirus proteje hela labarik-feto sira entre tinan 11 no 14, no introduz ona servisu triajen nian iha munisípiu balun. Ami iha ferramenta nesesáriu sira: vasina, triajen, no tratamentu,” nia dehan.
Nia mós haktuir, esensiál atu fó vasinasaun ba labarik-feto barak liután no halo ezame sira ne’ebé komprensivu liután.
“Ita bele prevene kankru serviks, ida-ne’e luta ida ne’ebe ita bele, no sei, manan hamutuk,” nia dehan.
TATOLI
