DILI, 25 Novembru 2025 (TATOLI)—Sekretáriu Estadu Igualdade (SEI), Tersa ne’e, selebra Loron 16 Ativizmu Kontra Violénsia Bazeia ba Jéneru (VBJ) ho tema: “Hasa’e konxiénsia kona-ba alfabetizasaun dijitál no seguransa online ba joven sira”, iha Akanunu, Hera, Postu Administrativu Kristu Rei, Munisípiu Dili.
Sekretária Estadu Igualdade, Elvina Sousa Carvalho dehan selebrasaun ne’e hanesan kampaña ka sosializasaun hodi hato’o mensajen pozitiva katak feto no labarik feto sira tenke livre husi kualker tipu violénsia, inklui iha espasu dijitál sira hanesan Facebook, WhatsApp no seluk tan.
“Sosializasaun ne’e ho objetivu atu sensibiliza ba ema hotu kona-ba utilizasaun loloos hosi mídia. Ha’u fiar katak sosializasaun ne’e importante tebes nune’e ema hotu hatene kria espasu livre no seguru ba feto no labarik-feto sira,” nia hateten ba jornalista sira.
Notísia relevante: SEI implementa pilár tolu hodi kombate violénsia bazeia ba jéneru
Liuhusi sosializasaun ne’e, Elvina esplika, joven sira sei iha konxiénsia oinsá uza espasu dijitál ho seguru no sei hetan edukasaun ne’ebe sólida hodi hatene sira-nia direitu no tipu violénsia ne’ebé akontese hasoru feto no labarik feto sira.
Elvina solisita joven sira-ne’ebé sai vítima ba espasu dijitál atu uza rede sosiál ho koñesimentu ne’ebé kle’an nune’e labele monu ba ema nia bosok sira no sai vítima.
Iha fatin hanesan, Xefe Suku Hera, Antoninho Marques da Silva, informa kampaña ne’e importante atu enkoraja joven sira atu hadook-aan husi violénsia.
“Liuliu agora, ita haree konteúdu sira-ne’ebé la apropriadu iha mídia sosiál sira, ne’ebé to’o hetan vizibilidade tanba teknolojia moderna. Maibé, ha’u fiar katak ita idak-idak tenke proteje ita-nia aan hosi tipu violénsia ida-ne’e,” nia dehan.
Jornalista: Osória Marques
Editór: Xisto Freitas da Piedade
