OEKUSI, 29 Novembru 2025 (TATOLI)–Primeiru-Ministru (PM), Kay Rala Xanana Gusmão, sábadu ne’e, halo abertura ba kompetisaun Corrida Cavalo ne’ebé kompete husi kuda 90 mai husi provinsia Nusa Tennggra Timur (NTT), munisipíu Kovalima hamutuk ho kuda sira Rejiaun Administrativa Espesiál Oekusi Ambeno (RAEOA), hodi komemora loron proklamasaun independénsia 28 Novembru ba da-50.
Notísia Relevante: Kuda 56 kompete iha Oekusi hodi selebra loron mundiál risku dezastre
Xefe Governu fó apresiasaun tanba ho kompetisaun kuda bele anima komunidade no nia rekomenda ba komisaun organizadora atu kria polítika ba futuru bele mós prodús ai-han ba kuda sira.
“Inisitiva di’ak. Kuandu iha polítika atu prodús ai-han ba kuda sira, tanba kuda sira-ne’ebé ohin tama mai husi TTU aas tebes, maibé kuda husi Oekusi badak hela. Parabéns ba imi hotu, ohin, ha’u bele haree imi-nia kuda sira atu halai, maibé prontu, imi iha ona vizaun ho esforsu boot. Apresia tebes ba imi-nia esforsu, imi-nia hanoin, halo nafatin ba, husu de’it katak imi-ne’ebé organiza bele halo kompetisaun maibé prepara mós hahan ba kuda sira,” Xefe Governu ne’e hateten iha serimónia abertura ne’ebé hala’o iha Suku Cunha, ohin.
Notísia Relevante: ACCOA husu Autoridade RAEOA orienta empreza finaliza projetu pista kuda iha Cunha
Iha fatin hanesan, Prezidente Autoridade RAEOA, Régio da Cruz Salu, konsidera pista corrida ne’ebé estabelese ona, nu’udar investimentu turizmu desportivu ida iha Oekusi.
“Estabelesimentu pista corrida ne’e ba future bele sai investimentu turizmu desportivu. Horisehik ita selebra ona akordu ho parsériu ida husi Indonézia, sei apoia ho sira-nia péritu atu halo formula kona-ba ai-han ba kuda, nune’e bele fasílita kuda na’in-sira. Sei fó mós oportunidade ba agrikultór Cunha Lalisuk ne’ebé besik árena ne’e bele investe mós iha ai-han ba kuda. Ema hotu bele sai investór mós atu partisipa iha investimentu ho prezensa árena kuda ne’e, ba ita-nia investimentu turizmu desportiva ba modalidade kuda,” nia hateten.
Prezidente Assosiasaun Corrida Cavalo Oekusi Ambeno (AKKOA), Mario Muni Salu, hateten objetivu husi kompetisaun ne’e define pontu importante tolu mak pontu primeiru atu hametin lasu amizade no fraternidade, kria unidade entre komunidade fronteira, tanba kompetisaun ne’e involve mós kuda husi Nusa Tenggara Timur (NTT) no kuda husi Kovalima.
Pontu daruak, atu komemora loron proklamasaun independénsia 28 Novembru ba da-50 (17 Novembru 1975-28 Novembru 2025).
Pontu datoluk, asosiasaun kuda eziste iha Oekusi hamutuk ho kuda na’in-sira, atu hamosu kompetisaun kuda nu’udar desportu kulturál, tanba dezde tempu bei-ala sira to’o jerasaun tuirmai tenke promove kuda sira, ho inisiátiva motiva tan kuda na’in-sira badinas haki’ak kuda, tanba uluk avo sira konsidera kuda hanesan meiu transporte prinsipál.
“Iha kompetisaun ne’e, iha kuda 90 mak halo kompetisaun. Komesa ohin, ita halo lansamentu ba to’o loron 04 Dezembru 2025 mak finál. Husi kuda 90 ne’e, kuda 60 husi Oekusi no kuda 20 husi NTT no 10 ho Kovalima, tanba intensaun husi kompetisaun atu selebra ita-nia loron proklamasaun independénsia 28 Novmebru nian,” nia dehan.
Notísia Relevante: Kompetisaun korrida iha Oekusi, kuda 42 tama finál
Tuir observasaun jornalista Ajénsia Tatoli, I.P nota katak, durante eventu kompetisaun ne’e la’o, hetan apoia seguransa másimu husi Komandu PNTL Oekusi no hetan apoia mós husi Serbisu Nasionál Ambulánsia Emerjénsia Medikamentu, Institutu Públiku (SNAEM, I.P).
Jornalista : Abílio Elo Nini
Editór : Cancio Ximenes
