BOBONARU, 05 Dezembru 2025 (TATOLI) – Komunidade iha aldeia Raifun Foho seidauk hetan naroman eletrididade no hein Governu atu iha tinan 2026 implementa Projetu Eletrifikasaun Nasionál hodi lori naroman ba aldeia ne’e.
Mateus Loe Mau abitante iha aldeia Raifun Foho, suku Raifun, postu administrativu Maliana, munisípiu Bobonaru, dehan ekipa husi Eletrisidade Timor-Leste (EDTL) halo ona site visited bá fatin ne’e. Nia espera katak antes tinan ne’e ramata iha ona desizaun ruma ba projetu instalasaun eletrisidade, tanba dezde independénsia sira moris iha nakukun laran.
Notísia relevante: EDTL orienta instala liña eletrisidade ba aldeia sira iha Bobonaro
“Ami hein katak molok tinan ne’e nia rohan ou janeiru sira ne’e bele mai serbisu ona para ami nia ahi bele tama ona. Tanba ami hela iha nakukun dezde ita ukun-an ne’e. Ema iha suku, aldeia viziñu sira-nia ahi lakan, sira goza tinan barak ona, kuitadu ami aldeia oan ida-ne’e mak seidauk”, nia lamenta.
Rezidente Afonso Pereira hateten bainhira instalasaun eletrisidade ne’e realiza fó kontente ba komunidade no nia fiar katak projetu ida-ne’e sei hasai aldeia husi nakukun no ba futuru ida ne’ebé nabilan liu.
“Ami fiar katak sira sei lori projetu ne’e mai iha ne’e iha tempu badak. Tempu to’o ona. Ami mós hakarak moris no goza ukun-an ida ne’e, hanesan aldeia no suku viziñu sira”, nia espera.
Aldeia Raifun Foho iha uma-kain 60-resin no nia totál populasaun 200-resin.
Notísia relevante: EDTL Bobonaru planeia instala enerjía eletridsidade iha Raifun-Lour-Kolimau
Jornalista: Sergio da Cruz
Editora: Maria Auxiliadora
