DILI, 09 Dezembru 2025 (TATOLI)–Ekipa Selesaun Nasionál Futeból Timor-Leste konsege rekolla pontu tolu hanesan ho uma-na’in Thailándia iha faze Grupu A kompetisaun SEA Games 2025.
Selesaun Nasionál Futeból Timor-Leste rasik rekolla pontu tolu referidu hafoin manán Singapura 1-3 ne’ebé hala’o iha Estádiu Rajamangala, Bangkok, Sábadu (06 Dezembru).
Notísia relevante: Jogu Sea Games, Timor-Leste derrota dahuluk ho Thailándia
Mezmu iha jogu ne’e Singapura mak lidera uluk tabela skor liuhosi golu Amir Syafiz iha minutu 11, maibé ekipa Lafaek responde kedas iha minutu 19 liuhusi jogadór Fábio Canovaro hafoin aproveita fallansu husi guarda rede Singapura.
Selesaun U-22 Timor-Leste hasa’e liután ritmu atake no lori rezultadu iha minutu ikus antes parte dahuluk ramata iha-ne’ebé jogadór Anizo Correia enxe golu iha minutu 42 no golu ikus husi Olagar Xavier iha minutu 45+1.
Ho rezultadu jogu ne’e, Timor-Leste konsege hakat bà pozisaun daruak ho pontu tolu (3) hanesan ho Thailándia, enkuantu Singapura iha pozisaun ikus ho pontu 0.
Jornalista: Natalino Belo
Editór: Xisto Freitas da Piedade
