OEKUSI, 11 Dezembru 2025 (TATOLI) – Prezidente Autoridade Rejiaun Administrativa Espesiál Oekusi Ambeno (RAEOA), Régio da Cruz Salu, deklara, daudaun ne’e, ekipa tékniku ho parte legál sira sei kontinua re-verifika no re-karateriza hela projetu emerjénsia 154 ne’ebé antes ne’e autoridade sesante suspende, tanba polítika Governu alokasaun orsamentu bazeia ba programa.
“Re-verifikasaun kontinua halo, prosesu ida la fasíl, husi re-verifikasaun deteta katak, iha lakuna balun akontese, ezemplu projetu ida iha kompañia rua ka tolu mak hetan orden serbisu, hanesan ne’e difísil ba ita atu haree, normalmente bele kanseladu hotu, maibé ita konsiente tanba povu mak husu autoridade atu dezenvolve entaun ita tenke halo re-verifikasaun no re-karaterizasaun. Husi re-karaterizasaun ita hatene ona konsege identifika, projetu ne’ebé mak nesesáriu hanesan raan, presiza emerjénsia duni no ida-ne’ebé mak trazetoriál, ita mós relata ona ba Governu Sentrál,” nia hateten iha Oekusi, ohin.
Notísia relevante:PA RAEOA konsidera suspensaun projetu emerjénsia 154 iha Oekusi legál
Tuir nia, Autoridade RAEOA laiha intensaun atu halais projetu suspende 154 ne’e, maibé presiza la’o tuir padraun téknika husi ADN no DRI, ne’ebé setór privadu sira mós iha ona koñesementu ba kritéria sira-ne’e, tanba bainhira foin hetan de’it orden serbisu, tenke konsulta uluk ho DRI atu haree maibé kompañia balun foin simu orden serbisu tuun kedas ba terrenu hala’o serbisu, entaun bainhira autoridade sesante hasai karta suspende, hot-hotu tenke kumpre.
“Ne’e mak re-karaterizasaun kuandu la nesesáriu, la presiza atu kontinua obra sira iha tinan ne’e, tanba primeiru osan mós laiha, segundu ADN ho DRI tenke re-verifika haree ba padraun tékniku kualidade, terseiru tenke konfirma mós alokasaun orsamentu 2026 nian laiha, politikamente Governu dehan orsamentu bazeia ba programa, sei osan laiha, programa ne’e mós labele halo,” nia hateten.
Notísia relevante:Primeiru-Ministru fó ona pareser ba Autoridade RAEOA kona-ba projetu pendente 154
Entretantu, Antes ne’e Prezidente Autoridade ezoneradu, Rogério Tiago de Fátima Lobato, deside hasai karta ofisiál ida hodi suspende projetu emejénsia ne’ebé antes ne’e selebra ona ordén serbisu iha loron 10 Jullu 2025 entre Konsellu Administrasaun Fundu Infraestrutura (KAFI) ho empreza sira.
Dokumentu ofisiál ne’ebé Ajénsia Tatoli,I.P, karta suspensaun ne’e, asina husi Prezidente Autoridade ezoneradu, Rogério Tiago de Fátima Lobato, iha loron 25 Agostu 2025, ho númeru reff. 454 / PA/RAEOA-TL/ VIII / 2025, hodi suhu ba emprezáriu lokál no nasionál sira ho asuntu suspensaun ba projetu emerjénsia KAFI dahaat no dalima.
“Bazea ba despaxu, Primeiru-Ministru ho númeru 014/PM/VII/2025 determina limite ba atuasaun administrativa RAEOA, hodi limite prosedimentu aprovizionamentu ba bens no servisu no obra públika no jestaun korente iha Oekusi, eseptu hetan autorizasaun husi Súa Excelênsia Primeiru-Ministru,” sita iha dokumentu ofisiál ne’ebé Ajénsia Tatoli asesu.
Iha karta ne’e mós, husu ba empreza ne’ebé mobiliza ona ekipamentus no materiál tenki pouza hodi hein desizaun no autorizasaun husi Primeiru-Ministru mai Prezidente Autoridade RAEOA foun.
Notísia relevante:Autoridade RAEOA hahú rezolve projetu pendente, extensaun, inklui estrada Tono ba Oésilo
Jornalista: Abílio Elo Nini
Editór: Rafael Ximenes de A. Belo
