ERMERA, 16 Dezembru 2025 (TATOLI) — Prezidensia Repúblika Timor-Leste selebra Festa Natal tinan 2025 ho halao asaun karidade ba prizioneru sira iha Estabelesemento Prizionál Gleno, Fatuquero, Munisípiu Ermera.
Asaun ida ne’e halao hanesan program ida husi Unidade Servisu Sosiedade Sivíl hodi entrega direta Parsél Natal hamutuk 110, ne’ebé kontein nesecidade pessoal sira hanesan manta, roupa, pasta-dente, rinso, sabaun, shampo no sasan seluk tan, inklui fasilidade desportiva nian.
Diretora Jeral Prezidensia Repúblika, Aida Maria dos Santos, hateten katak sasan sira ne’ebé entrega laos iha valor bo’ot husi folin, maibé iha valor morál no domin ne’ebé aas tebes husi Prezidente da Repúblika ba prizioneru sira.
“Maské Prezidente da Repúblika la iha fatin ida ne’e, maibé nia domin no ksolok iha ne’e hodi hatutan Boas Festas Natal ba imi hotu. Iha tinan-tinan Prezidente sempre halao programa karidade ho Sosiedade Sivil, no programa ida ne’e kontinua too ohin loron,” dehan Aida Maria dos Santos ba Prizioneriu sira iha Estasionamentu Prizionál Gleno, Tersa ne’e.
Iha fatin hanesan Asesor Unidade Servisu Sociedade Sivil no Asuntu Sosial, Quintiliano Moniz, informa asaun karidade ida ne’e laos deit tanba nesecidade baziku, maibé tanba domin ne’ebé mai husi Prezidente da Repúblika, José Ramos-Horta no Primeiru-Ministru, Kay Rala Xanana Gusmão.
“Ami mai iha ne’e hodi lori Sua Excelénsia Prezidente Repúblika no Primeiru Ministru nia ain no liman ba ita boot sira. Ne’ebé maské laiha mandatu formál, maibé sira nia fuan sempre nakloke ba ema sira ne’ebé presiza,” Nia esplika.
Prezidensia Repúblika sei kontinua asaun karidade ba prizaun sira iha Suai, Dili no mos ba orfanatu sira iha Timor laran tomak.
Hatutan Prezidente Republika nia mensajen, Asesor ne’e mos husu ba prizioneru sira atu la lakon esperansa, tanba ema hotu la ses husi sala, no espera katak husi prizaun bele sai hodi lori buat diak ba familia, sosiedade no nasaun.
Diretór Estasionamentu Prizionál Gleno, Cristiano Salsinha, iha entrevista hato’o agradese ba asaun karidade ida ne’e, tanba Prezidente da Repúblika la haluha ema sira ne’ebé iha klot nia laran.
“Asaun karidade la hare’e ba ema iha liur deit, maibé mos hare’e ema sira iha klot. Ida ne’e agradese tebes,” dehan Cristiano.
Dadaun ne’e total prizioneru iha Estasionamentu Prizionál Gleno hamutuk 97, ne’ebé kompostu husi feto 20 no mane 77, iha mós bebe nain tolu (feto rua no mane ida), no estranjeiru nain haat (feto tolu no mane ida).
Nia esplika katak tuir lei, bebe nain tolu ne’ebé agaora hela iha prizaun tanba tuir inan no tuir lei bebe sira foin bele entrega ba familia bainhira to’o ona idade tinan rua, tanba bebe sei presiza inan no simu tratamentu hanesan oan.
“Ita tau matan ba oan sira ne’e tanba sira inosente. Entaun ita halo koperasaun ho entidade sira seluk, inklui setór saúde, hodi hare’e ba tratamentu sira,” Nia dehan.
Nia espera katak sasan sira ne’ebé entrega iha loron ne’e la hare’e ba sasan deit, maibé hare’e ba valor asaun karidade ne’ebé Prezidente da Repúblika hato’o husi nia Asesor no Diretora Jeral, tanba solidariedade ne’e iha valor boot liu ba prizioneru sira.
Jornalista : Cidalia Fátima
Editora: Armandina Moniz
