DILI, 30 Dezembru 2025 (TATOLI)—Administrasaun Navegasaun Aérea Timor-Leste (ANATL) rekolla reseita millaun $3-resin durante 2025.
Prezidente Konsellu ANATL, Romualdo António Soares da Silva, hateten katak reseita sira ne’e mai husi taxa aterrajen, taxa seguransa, estasionamentu no seluk tan.
“Ami hein katak ho instalasaun foun [sistema estasionamentu automatizadu no área partida] iha Aeroportu Internasionál Nicolau Lobato bele hasa’e ANATL nia reseita iha tinan oin”, Romualdo dehan ba Tatoli iha nia eskritóriu, iha Dili.
Aleinde reseita operasionál, ANATL mós hetan alokasaun verba hamutuk millaun $1.8 iha Orsamentu Estadu 2025 no to’o ohin loron ezekuta ona maizumenus pursentu 90.
Lembra katak iha tinan 2024 ANATL mós rekolla reseita hamutuk $2.869.545,26. Reseita ne’e mai husi fonte 12 ne’ebé daudaun ne’e implementa iha aeroportu.
Tuir regulamentu, ANATL iha poténsia ba fonte reseita hamutuk 22, maibé kondisaun no ekipamentu aeroportu ne’ebé limitadu mak implementa de’it kategoria reseita 12.
Reseita aeroportu nian fahe ba kategoria prinsipál rua: reseita aeronáutika no reseita la’ós aeronáutika. Kategoria rua ne’e iha fonte reseita ne’ebé diferente.
Reseita atuál 12 inklui taxa aterrajen, taxa seguransa pasajeiru, impostu aeroportu, balkaun check-in, gastu retallu, servisu ai-han no hemu, publisidade, servisu estasionamentu, kartaun asesu, aluga propriedade, no fasilidade sira seluk.
Ho melloramentu instalasaun no optimizasaun fonte reseita, ANATL hein atu habelar implementasaun kategoria reseita sira seluk hodi hametin independénsia finanseira setór aviasaun nasionál.
Jornalista: Arminda Fonseca
Editora: Maria Auxiliadora
