BOBONARU, 06 Janeiru 2026 (TATOLI) – Udan-boot ne’ebé akontese horisehik, pur volta tuku 06h00 dadeer kauza inundasaun ne’ebé afeta ba komunidade iha aldeia Miguir, suku Aidabaleten, postu administrativu Atabae, munisípiu Bobonaru.
Xefe Aldeia Miguir, José Angelino, haktuir katak iha loron 18 fulan-Novembru 2025 akontese uluk ona inundasaun iha área referida no kontinua horisehik to’o dadeer ne’e, tanba espasu iha ponte Miguir nian ne’ebé kloot.
Notísia relevante: IGEADI hasai ona sedimentasaun iha ponte Miguir
“Akontes ida uluk ne’e volume bee la boot ida, más horisehik ho ohin ne’e volume bee boot. Ai boot haat mak bee lori mai sena uluk depois ai-oan no rai-henek mai taka metin, ne’e mak bee sai fali mai estraga komunidade nia uma”, nia informa ba Tatoli via telefone, ohin.
Tuir dadus ne’ebé autoridade kompetente identifika, uma-kain sia mak afeta ba dezastre naturál ne’e, inklui danifika komunidade nia plantasaun no fatin negósiu iha minimerkadu iha Miguir.
“Sira-nia bikan-kanur no sasán uma-laran bee lori hotu, depois sira-nia uma bee sobu didin sira ba hotu. Baraka ne’ebé negosiante sira fa’an iha parte sorin mai ne’e estraga mós hotu”, nia relata.
Autoridade ne’e rekomenda ba parte kompetente atu buka meiu hodi rezolve espasu iha ponte ne’e tanba ba oin sei akontese nafatin inundasaun bainhira udan ho volume aas liu. “Loloos ne’e ponte ku’ak laiha, agora sira halo fali hanesan kuartu toba fatin ne’e mak akontese hanesan ne’e. Loloos kuartu ida de’it para bee boot ne’e lori fo’er mai bá liu”, nia sujere.
Antes ne’e, Koordenadór Infraestrutura Ministériu Obra Públika munisípiu Bobonaru, Fernando de Fátima, dehan ekipa téknika identifika katak inundasaun ne’e mosu la’ós tanba espasu ponte ne’ebé kloot.
“Ita-nia komunidade sira taa hela ai-akar sira soe hela, entaun udan-boot hori bainhira ne’e lori hotu fo’er sira ne’e, sedimentasaun nakonu tiha, bee sai la di’ak, nakonu hodi sa’e liu tiha penahan ida uluk ita halo ne’e mak fó fali impaktu ba komunidade nia to’os no uma balun”, nia hateten foin lalais ne’e.
Daudaun ne’e, ekipa Korpu Bombeiru Munisípiu Bobonaru iha ona terrenu no serbisu hamutuk ho komunidade hodi taa ai-hun boot ne’ebé taka metin ponte ne’e.
Notísia relevante: MOP presiza hasai sendimentasaun iha ponte Miguir
Jornalista: Sergio da Cruz
Editora: Maria Auxiliadora
