IGEADI hasai ona sedimentasaun iha ponte Miguir
BOBONARU, 21 Novembru 2025 (TATOLI)- Institutu Jestaun Ekipamentu no Apoiu Dezenvolvimentu Infraestrutura (IGEADI) mobiliza ona ekipamentu pezadu bá terrenu hodi hasai sedimentasaun iha ponte Miguir, suku Aidaba Leten, postu administrativu Atabae, munisípiu Bobonaru, hafoin udan-boot iha loron 18 Novembru ne’e.
Koordenadór Infaestrutura Ministériu Obra Públika munisípiu Bobonaru, Fernando de Fátima, dehan intervensaun ne’ebé IGEADI halo bazeia ba orientasaun husi Ministru Obra Públika, Samuel Marçal, atu halo normalizasaun hodi evita akontese tan inundasaun.
Notísia relevante: MOP presiza hasai sendimentasaun iha ponte Miguir
“Horisehik IGEADI komesa hasai hotu sedimentasaun sira. Agora mós sira sei serbisu hela”, nia informa ba Tatoli via telefone, ohin.
Fernando salienta katak ekipa téknika Obra Públika munisípiu Bobonaru identifika katak inundasaun ne’e mosu la’ós tanba espasu ponte mak kloot.
“Ita-nia komunidade sira ta’a hela ai-akar sira, so’e hela, entaun udan-boot horibainhira ne’e lori hotu fo’er sira ne’e, sedimentasaun nakonu tiha, bee sai la di’ak, nakonu hodi sa’e liu tiha penahan ida uluk ita halo ne’e mak fó fali impaktu ba komunidade nia to’os no uma balu”, nia informa.
Inundasaun ne’e afeta ba uma-kain 18 ho nia membru hamutuk 75.
Notisía relevante: Vítima inundasaun iha Miguir simu apoiu emerjénsia
Jornalista: Sergio da Cruz
Editora: Maria Auxiliadora
