DILI, 15 Janeiru 2026 (TATOLI)–Prezidente Tribunál Rekursu (PTR), Afonso Carmona, kinta ne’e, hasoru malu ho Prezidente Repúblika José Ramos-Horta hodi relata situasaun jerál Tribunál nian no servisu ne’ebé sei hala’o iha tinan 2026.
“Ha’u mai iha ne’e atu relata situasaun jerál Tribunál nian ba Prezidente Repúblika, tanba ita hatene katak agora tama ona ba tinan foun serbisu lubuk ida mak ami sei hala’o liuliu julgamentu sira tenke la’o ho di’ak,” Prezidente Tribunál Rekursu (PTR), Afonso Carmona, hateten ba jornalista sira hafoin ramata enkontru ho Xefe Estadu iha Palásiu Prezidensiál, Nicolau Lobato Dili.
Nia dehan, daudaun ne’e julgamentu hotu la’o ho di’ak tanba juiz estajiadu hamutuk na’in-12 mak hala’o hela sira-nia kna’ar hamutuk ho juiz tuan sira.
“Parte seluk kona-ba prosesu instalasaun ba Supremu Tribunál Justisa ida-ne’e komisaun iha ona, ha’u labele komenta tan. Ami-nia parte mak prepara de’it Juiz sira-nia avaliasaun para bele konkorre iha selesaun atu sai juiz konsilleru, Juiz dezembarku iha Tribunál Rekursu,” Carmona dehan.
Nia hatutan, juiz ne’ebé prepara atu konkorre ba Supremu Tribunál Justisa hamutuk 32, maibé husi númeru ne’ebé iha na’in-tolu (3) hala’o kna’ar seidauk to’o tinan 10.
“Mibé ida-ne’e ha’u labele ko’alia barak tanba komisaun harii ona, sira mak sei pronunsia sai buat hotu. Ha’u só komenta de’it ba juiz sira-ne’ebé ami prepara,” nia dehan.
Jornalista : Hortencio Sanchez
Editór : Cancio Ximenes
