KOVALIMA, 19 Janeiru 2026 (TATOLI)– Sekretariadu Tékniku Administrasaun Eleitorál (STAE) Munisípiu Kovalima halo resensiamentu eleitorál atualiza baze dadus (RE-ABD) hahú husi novembru 2024 to’o Dezembru 2025 ne’e, prodús ona kartaun biométriku 18,040 ba sidadaun sira.
“ Ita hahú halo atendimentu ba sidadaun sira hasai kartaun eleitorál ho sistema biométriku iha Novembru 2024 to’o dezembru 2025 ne’e STAE prodús ona kartaun eleitorál hamutuk 18,040″, Diretór STAE Kovalima, Francisco Gusmão, relata dadus ne’e ba jornalista sira iha STAE Kovalima ohin.
Dirijente STAE ne’e esplika katak, eleitór 18.040 mak hasai ona kartaun eleitorál ho sistema biométriku, kompostu husi eleitór ne’ebé mak tinan 16 hasai kartaun eleitorál foun hamutuk 1.656 husi númeru ne’e mane hamutuk 797 no feto 859. Ba sidadaun ne’ebé mak durante ne’e atualiza de’it sira nia dadus hodi troka eleitorál antigu ba biométriku hamutuk 16,384 kompostu mane 7,748 no feto 8.636.
STAE prodús ona kartaun biométriku 18,040, maibé STAE kontinua halo atende sidadaun sira hasai kartaun eleitorál ne’e hanesan atividade rutina atu halo atendimentu ba eleitór sira atu atualiza dadus no eleitór sira ne’ebé mak atu hasai kartaun foun ho diária.
“Ho nune’e, ita uza fali sistema foun bainhira sidadaun sira atu foti sira-nia kartaun mak ita foin bele imprime sira-nia kartaun eleitorál hodi sira foti nia kartaun”, nia afirma.
Oráriu atendimentu hahú husi segunda to’o sesta-feira, tuku 8:00 to’o tuku 12:00, hafoin 13:30 tama fali to’o 17:30.
Jornalista: Celestina Teles
Editór: Florencio Miranda Ximenes
