DILI, 20 Janeiru 2026 (TATOLI)—Diretór Servisu Saúde Dili, Mateus Pinto, hateten iha inisiu fulan-Janeiru 2026, Servisu Saúde Munisípiu Dili rejista kazu dengue hamutuk 223 husi, no númeru ne’e laiha ema ida mak lakon vida.
Notísia Relevante: HNGV koordena ho SSMD buka solusaun ba HNGV “overload” tanba dengue sa’e
“Kona-ba kazu dengue iha inisiu fulan-Janeiru tinan 2026, Servisu Saúde Munisípiu Dili rejista kazu aas.Tanba ne’e, ha’u husu ba komunidade atu ida-idak bele halo limpeza iha sira-nia uma ninin,” Mateus Pinto hateten ba jornalista sira, iha Sentru Saude Formosa, ohin.
Nia relata, dadus ne’ebé mak iha Servisu Saúde Munisípiu Dili rejista ne’e mai husi Sentru Saúde komunitáriu haat ne’ebé mak estebelese iha Kapitál Dili.
“Ne’e husi Sentru Saúde haat iha Dili laran ne’e hanesan Metinaru ladún a’as maibé iha Dili laran ne’e mak boot, hanesan Postu Administrativu haat ne’ebé mak eziste iha Dili laran mak Dom Aleixo, Cristu Rei, Vera Kruz no Na’in Feto maibé Metinaro ladún barak,” nia dehan.
Ema sira-ne’ebé mak lakon vida ba dengue, daudaun ne’e Dili seidauk iha maibé infomasaun ne’ebé mak ohin Hospitál Nasionál Guido Valadares fó hatene ona katak na’in-ida (1) mak mate, maibé ohin rona dehan la sala husi Tibar, entaun Dili seidauk rejista kazu mate.
Nia haktuir, moras dengue ne’e iha klarifikasaun hanesan dengue moderadu, dengue leve no dengue normál, ida ne’e mak agora daudaun baixa iha Sentru Saúde sira.
Kona-ba fumigasaun hanesan ema hotu hateten katak programa ne’e la’o signifika katak seidauk halo alargamentu la hanesan iha 2023, tanba sei hein hela orsamentu.
Foin dadauk halo ona enkontru ho autoridade lokál sira iha Munisípiu Dili atu husu oinsá sira bele kontribui hanesan fó hatene ba komunidade ida-idak halo limpeza, tanba ne’e saúde la orientá komunidade atu b halo limpeza iha mota kuak sira no mós halo limpeza iha baleta kuak sira.
“Ami husi saúde orientá de’it ba komunidade no autoridade lokál sira liuliu ba komunidade atu halo limpeza iha sira-nia rezidénsia de’it, liuliu iha sira-nia uma laran no uma ninian sira. Sasán sira-ne’ebé mak la uza hodi rai fatin maran, atu nune’e bele kontribui hodi redús moras dengue iha fulan sira tuir mai,” nia dehan.
Tuir Relatóriu ne’ebé mak Servisu Saúde Munisípiu Dili simu katak iha área balun ne’ebé mak risku ba dengue.
“Bazeia ba dadus ba 2025 ne’ebé ita haree ha’u hanoin iha Dom Aleixo iha suku Komoro ho Bairru Pite mak dadus ne’e a’as,” nia konklui.
Jornalista : Felicidade Ximenes
Editór : Cancio Ximenes
