DILI, 20 Janeiru 2026 (TATOLI)—Diretór Servisu Apoiu Diagnostiku no Terapéutiku Iha HNGV, Vidal de Jesus Lopes, hateten HNGV halo koordenasaun ho Servisu Saúde Munisípiu Dili (SSMD) hodi buka soluasaun ba overload iha Hospitál Nasionál tanba kazu dengue agora sa’e maka’as.
Notísia Relevante: OMS entrega ona sertifikadu livre husi Malária ba MS
“Ami enkontru ho Servisu Saúde Munisípiu Dili ho obejtivu atu responde ba overload ne’ebé mak kada loron pasiente nakonu iha HNGV, tanba ne’e mai koordena ho Servisu Saúde Munisípiu Dili oinsá atu buka soluasaun espesifikamente ba kazu dengue ne’ebé mak agora aumenta makaas. Tanba ne’e, HNGV utiliza hotu ona espasu sira maibé pasiente mai nafatin no nakonu,” Vidal de Jesus Lopes informa ba jornalista sira iha Formosa, ohin.
Servisu Saúde Munisípiu Dili sai alternativa, tanba kooperasaun ida-ne’e la’o kle’ur ona maibé agora mai atualiza fila-fali informasaun, nune’e bele buka soluasaun.
Tanba ne’e, Servisu Saúde Munisípiu Dili pronto nu vontade tomak hodi ajuda HNGV atu buka soluasaun, nune’e ba oin kazu sira-ne’ebé mak HNGV iha ho kondisaun leve ka kmaan ne’e HNGV bele refere ba iha Sentru Saúde Formoza no Vera Crus, tanba sira iha pesoál saúde ne’ebé mak sufisiente.
“Banhira iha kazu grave ruma mak transfere ba HNGV. Se haree ba mak kmaan, halo tratamentu de’it iha sentru saúde sira-ne’ebé mak ohin mensiona ne’e. Moras sira-ne’ebé mak halo tratamentu ne’e konsentra liu ba dengue, tanba dengue agora sa’e makaas. Maibé, ohin, ami deside katak moras pneumonia ka infeksaun iha pulmaun mak iis-boot, ami bele simu no mai iha HNGV,” nia dehan.
Nia haktuir, kama ne’ebé mak HNGV iha ne’e utiliza hotu ona hamutuk 500-resin, entaun paisente mai nafatin nune’e HNGV buka solusaun mak husu ba munisípiu Dili atu halo tratamentu iha sentru saude Formosa no Vera Crus.
Diretór Servisu Saúde Munisípiu Dili, Mateus Pinto, rekoñese parte husi Hospoitál Nasionál Guido Valadares mós mai atu ko’alia ho Servisu Saúde Munisípiu Dili oinsá bele prepara mós fatin bainhira Hospitál Nasionál Guido Valadares overload.
Tuir nia, se overload ne’e karik bele traferénsia pasiente balun mai, tanba ne’e Sentru Saúde Formosa iha ona kama 18 atu bele fó baixa ba pasiente sira.
“Iha sentru saúde Formosa iha kama 18, karik kazu kma’an,ita bele haree iha ne’e maibé todan liu ita bele komunika. Hanesan moras todan mak toba iha ne’e mak médiku espesialista sira mai observa ou ita mak lori ba iha ne’ebá, tanba ne’e mak ohin iha ne’e atu ita ko’alia hamutuk, karik pasiente moras kma’an iha ne’ebá bele muda mai iha ne’e. Karik pasiente sira moras todan, bele muda fali ba iha ne’ebá,” Mateus Pinto hateten.
Nia esplika, tanba ne’e mak sentru saúde Formosa iha kama 18 atu prepara no hamutuk ho emerjénsia ne’e haat bele dehan kama iha 22 ne’ebé mak bele responde ba ida-ne’e.
Kona ba rekursu umanu, nia informa, médiku no infermeira sira iha sentru saúde Formosa sufisiente hela atu bele atende pasiente sira.
“Mais kazu ne’e mak todan uitoan. Hakarak ka lakohi tenke espelialista sira husi HNGV tenke mai. Tanba ida-ne’e mak ohin ami kordena atu iha ne’e mak sira mai haree ka lae, ho ida mak depois ita ko’alia ida-ne’e,” nia dehan.
Notísia Relevante: MS garante programa Wolbachia bele redús moras dengue iha TL
Jornalista : Felicidade Ximenes
Editór : Cancio Ximenes
