OEKUSI, 20 Janeiru 2026 (TATOLI) – Primeiru-Ministru (PM), Kay Rala Xanana Gusmão, akompaña hosi Ministru Planeiamentu Investimentu no Estratéjiku (MPIE), Gastão Sousa, Prezidente Autoridade RAEOA, Régio da Cruz Salu, tersa ne’e, hala’o vizita ba oan-ki’ak sira iha orfonatu Topohonis Kutete sub-rejiaun Pante Makasar Rejiaun Administrativa Espesiál Oekusi Ambeno (RAEOA).
Observasaun Jornalista Ajénsia Tatoli,I.P, iha vizita supreza ne’e, Xefe Governu halo animasaun ba oan-ki’ak sira, hodi fahe ai-han, konta istória no dala-lia halimár ho oan-ki’ak sira.
Iha animasaun ne’e, Xefe Governu apela ho lian-maka’as, hodi enkoraja oan-ki’ak sira, atu labele hanoin barak, maibé foku ba estuda, hodi prepara-an ba futuru.
“Imi lalika hanoin barak, hanoin mak estuda, estuda. Imi hela iha ne’e, serbisu mak estuda de’it, tanba imi sei ki’akoan labele kaer serbisu todan, imi-nia serbisu mak estuda. Haku’ak boot ba imi hotu,” Primeiru-Ministru, enkoraja sira bainhira fahe hela ai-han ba oan-ki’ak sira iha orfonatu Topohonis Kutete, ohin.
Hafoin dadalia durante oras balun nia laran, Responsavel Topohonis Kutete, Liliana Tarung, konvida Primeiru-Ministru hodi observa aredór Topohonis nian, no observa konstrusaun sira hanesan bee-moos, edifísiu no fasilidade seluktan.
Notísia relevante: https://tatoli.tl/2025/09/11/komandu-f-fdtl-tulun-ai-han-ba-labarik-sira-iha-orfonatu-topohonis-oekusi/
Iha momentu ne’e, Responsavel Topohonis Kutete, Liliana Tarung, relata ba Primeiru-Ministru katak, oan-ki’ak sira-ne’ebé hela iha orfonatu Topohonis Kutete hamutuk na’in-14, mane-13 no feto ida, maioria idade minoridade tanba foin mak eskola iha ensinu Báziku, no sira-ne’ebé hela iha orfonatu Topohonis Mahata parte vila hamutuk na’in-22.
“Ne’ebé ami sente kontenti tebes, ohin Avo Nana mai vizita ami iha Kutete, ne’e hanesan korajen boot no prezente boot mai ami,” nia orgullu.
Jornalista: Abílio Elo Nini
Editór: Rafael Ximenes de A. Belo
