OEKUSI, 08 Jullu 2026 (TATOLI) – Ministériu Edukasaun (ME) liuhusi Sekretáriu Estadu Ensinu Sekundáriu Jerál no Tékniku Vokasionál, kuarta ohin oferese fasilidade Sentru Informasaun Teknolojia (ICT) hanesan komputadór unidade neen no mákina impresora ida ba Eskola Tékniku Vokasionál Agrikultura Oekusi (ETARO) Rejiaun Administrativa Espesiál Oekusi Ambeno (RAEOA).
Atribuisaun no apoia ekipamentu didátiku sira-ne’e bazeia ba Lei Rejime Jurídiku Administrasaun Finanseira Estadu nian (Lei n.º 2/2022) ne’ebé regula jestaun patrimóniu públiku, hamutuk ho Dekretu-Lei Orgánika Ministériu Edukasaun nian, ne’ebé fo kompeténsia ba tutela hodi asegura dezenvolvimentu infraestrutura no modernizasaun dijitál ba fardamentu ensinu tékniku-vokasionál iha territóriu nasionál.
Notísia relevante:ME lansa Sentru Informasaun Teknolojia iha Oekusi
Sekretáriu Estadu Ensinu Sekundáriu Jerál no Tékniku Vokasionál, Domingos Lopes Lemos, hateten katak apoia ne’e nu’udar polítika Ministériu Edukasaun, tanba antes ne’e tinan barak RAEOA nu’udar rejiaun espesiál ladún hetan kontrolu husi Governu Sentrál.
“Maibé foin daudaun ita mai observa, katak buat barak maka presiza Governu Sentrál nia apoia, hanesan fasilidade ICT nian, tanba edukasaun tenke iha mudansa ba prosesu aprendizajén, ne’ebé apoia ne’e hanesan primeiru sei kontinuasaun ba futuru, maibé agora ita hahú ona, atu tulun ita-boot sira iha eskola, bele utiliza teória no prátika,” nia hateten iha salaun edukasaun Oekusi, ohin.
Governante ne’e apela, fasilidade ne’ebé oferese ona nu’udar patrimóniu públiku ba eskola nian, nune’e presiza halo jestaun atu estudante sira bele asesu hotu inklui profesór sira, “Maibé maka ne’e, utiliza karik tenke ho dixipliña, tanba imi nian ona, uza didi’ak tanba sasán sira ne’e apoia tebes ita-boot sira iha eskola,” nia fó hanoin.
Modernizasaun dijitál no dadus ETARO
Iha biban ne’e, Diretór Eskola Tékniku Vokasionál Agrikultura Oekusi (ETARO), José Kehi, sente haksolok, tanba ho prezensa fasilidade ICT hirak-ne’e sufisiente ona atu apoia ba prosesu aprendizajen.
“Orgullu tebes ba Governu nia apoia, ida-ne’e hatudu katak, Governu komesa tau importánsia ba setór edukasaun atu adapta teknolojia modernu nian. Ami-nia esperansa katak ho fasilidade unidade neen ne’e sufisiente ona atu apoia ami nia prosesu aprendizajén, tanba komputadór daudaun eziste iha ETARO hamutuk 31 no projetór ne’ebé apoia husi povu Indianu liuhusi programa UNDP,” nia espera.
Totál estudante ativu hela iha ETARO hamutuk na’in-100 ho profesór na’in-21.
Jornalista: Abílio Elo Nini
Editór: Rafael Ximenes de A. Belo
