OEKUSI, 21 Fevereiru 2025 (TATOLI) – Ministra Edukasaun (ME), Dulce de Jesus Soares, sesta ne’e, halo lansamentu ba Sentru Informasaun Téknolojia (ICT) iha Rejiaun Administrativa Espesiál Oekusi Ambeno (RAEOA).
Biban ne’e, Governante ne’e enkoraja funsionáriu sira iha servisu edukasaun Oekusi hamutuk ho profesór sira presiza aprende nune’e bele hasa’e koñesimentu kona-ba utilizasaun téknolojia.
Notísia relevante:Kualifika rekursu umanu sai prioridade ba Edukasaun Oé-Cusse iha 2025
“Sentru ne’e, tuir planu sei fó prioridade ba funsionáriu edukasaun, signifika hakarak ka lakohi tenke mai iha fatin ne’e atu aprende tanba sai funsionáriu kuandu iha promosaun eskalaun ne’e servisu uza barakliu téknolojia,” nia dehan iha ámbitu halo lansamentu ne’e.
Ministra Edukasaun apresia tebes ho esforsa tomak husi Autoridade tanba fasilidade instaladu maibé depende fali mekanizmu utilizasaun.
“ Ha’u haree fasilidade sira-ne’e di’ak tebes tanba iha nasionál laiha fasilidade sira hanesan ne’e, ha’u fiar katak sei fasilita di’akliu tan funsionáriu edukasaun Oekusi,”dehan Ministra ne’e
Iha fatin hanesan, Sekretária Rejionál Edukasaun no Asuntu Sosiál, Inácia Tamele, hateten sentru ne’e atu fasilita formasaun ba funsionáriu sira iha edukasaun, liuliu ba profesór na’in-27, mak sei tuir klase dahuluk ba formasaun.
“Maibé ba oin, sentru ne’e la’ós de’it servisu edukasaun Oekusi, maibé fó oportunidade ba jovén no Sekretáriu Rejionál sira seluk atu hasa’e koñesimentu. Ami sei oferese formasaun mós ba estudante sira-ne’ebé la konsege kontinua estudu iha nivél universidade, maibé presiza kumpre tanba ami iha módulu atu la’o tuir,” nia dehan.
Molok ne’e, Governu Índia apoia edukasuan Oekusi, ne’ebé implementa husi Ajénsia Internasionál United Nation Development Program (UNDP), ba fatin haat mak hanesan Eskola Bázika Sentrál (EBC, sigla portugés) Aenmat, Eskola Sekundária Jerál (ESG) Baqui, Eskola Tékniku Agrikultura Oé-Cusse (ETARO) no laboratóriu Robotika iha Eskola Tékniku Vokasionál (ETV) Palaban.
Notísia relevante:Embaixadór Índia observa Sentru TIC haat iha Oé-Cusse
Jornalista: Abílio Elo Nini
Editór: Florencio Miranda Ximenes
