DILI, 26 Janeiru 2026 (TATOLI)—Diretora Nasionál Transporte Terrestre, Maria Antónia, informa daudaun ne’e Dirasaun Tránzitu Seguransa Rodoviáriu hamutuk ho PNTL liuliu polísia tránzitu hodi kontinua halo monitorizasaun ba operasaun transporte públiku iha territóriu liuliu iha sidade Dili no mós iha munisípiu sira.
“Tanba ita haree katak motorista transporte públiku barak mak halai la tuir regra ne’ebé estabelese hanesan sináial tránzitu,” Diretora Nasionál Transporte Terrestre, Maria Antónia, hateten ba Agência Tatoli iha nia kna’ar fatin Balide, ohin.
Bainhira kliente ida atu trata karta veíkulu ba transporte públiku, DNTT sempre halo teste prátika no sempre fó hanoin ba sira atu kumpre rekezitu bainhira halo movimentu iha espasu públiku, sira mós sempre halo sensibilizasaun informasaun kódigu rodoviária nian no públika iha mídia sosiál.
Maibé, tuir nia, ema barak mak nafatin kontra regra sira-ne’e liuliu agora sira mós estabelese ona halte ba pasajeiru sira, tanba ne’e mikrolete sira tenke tula no hatun pasajeiru iha halte ne’ebé Governu prepara ona, karik área balun ne’ebé seidauk iha halte entaun kontinua halo movimentu hanesan baibain.
“Maibé bainhira mikrolet sira la kumpre, ami sei fó sansaun selu multa tuir kódigu estrada no sei halo deklarasaun komprometidu atu la komete tan. Maibé nafatin kontra entaun ami sei hapara lisensiamentu ba operasaun transporte nian,” nia dehan.
Daudaun ne’e, Ministériu Transporte Komunikasaun foin mak hari’i halte 10 iha Dili laran maibé tuir estudu viabilidade ne’ebé mak iha katak Governu sei hari’i halte purvolta 50, ne’ebé agora fazeadamente ita foin hari’i halte 10, razaun sira seidauk hari’i halte tamba iha parte balun sei iha hela prosesu alargamentu estrada.
Jornalista : Alexandra da Costa
Editór : Cancio Ximenes
