DILI, 26 Janeiru 2025 (TATOLI)—Diretór Gabinete Lisensiamentu no Rejistu ba Atividade Saúde iha Ministériu Saúde (MS), Nuno da Costa, informa Ministériu Saúde fó ona lisensa ba SK Medical Center iha Timor-Leste.
Diretór Gabinete Lisensiamentu dehan SK Medical Center prenxe duni rekizitu Ministériu Saúde nian, no tanba ne’e Ministériu fó lisensa iha 14 Janeiru tinan ne’e.
“Rekizitu mínimu ba ospitál ida inklui estasionamentu no rekursu umanu no sira seluk. Sentru Médiku SK kumpri rekizitu sira, iha estasionamentu iha rai okos, instalasaun mortuáriu ida no instalasaun sira-ne’ebé sufisiente,” nia hateten ba jornalista sira iha nia kna’ar fatin, Kaikoli, Seguda ne’e.
Notísia relevante: Starking Medical Center prepara ona rekursu umanu
Iha parte seluk, Diretór Empreza Star King, Lay Siu Hing, dehan sei halo abertura ba SK Medical Center iha 09 Fevereiru. Atividade dahuluk sei halo atendimentu ba parte ICU (Intensive Care Unit) no atividade seluk mak halo tratamentu ba moras sira-ne’ebé komún liu.
“Lisensa ne’ebé maka Ministériu Saúde fó ba SK Medical Center prevee uluk abertura temporária fulan ida ka rua hodi verifika katak buat hotu la’o ho loloos molok ita loke atividade sira seluk ne’ebé esensiál liu,” nia hateten.
Diretór akresenta rekursu umanu ne’e sufisiente ona tanba médiku hamutuk 83, médiku jerál na’in-11, médiku espesialista na’in-haat no enfermeiru hamutuk 68.
Jornalista: Osória Marques
Editór: Xisto Freitas da Piedade
