DILI, 26 Janeiru 2026 (TATOLI)—Polísia Nasionál Timor-Leste (PNTL) liuhusi Diresaun Nasionál Servisu Investigsaun Kriminál (DNSIK) halo ona investigasaun ba inséndiu ne’ebé akontese iha Postu Administrativu Dom Aleixo, Tasi-Tolu BTN 1, Aldeia 12 Outobru, ne’ebé rezulta kazál ida ahi-han, la konsege salva-an to’o hakotu iis, iha Domingu (25/01) tuku 18:00.
“Ahi-han uma akontese iha Tasi-Tolu ne’ebé rezulta sidadaun na’in-rua, feto ida mane ida mate kauza husi inséndiu ne’e rasik. Motivu husi inséndiu ne’e sei iha faze investigasaun ne’ebé ami seidauk bele públika tanba saida mai akontese ou akontese oinsá,” Diretór Nasionál Servisu Investigsaun Kriminál, Superintendente Polísia João Belo dos Reis, hatetena Jornalista sira iha ninia knaar fatin, Komandu Jerál PNTL, Kaikoli, Segunda ne’e.
Notísia relevante : APC rekomenda MTK orienta motorista transporte públiku tuir formasaun kombate inséndiu
Komandante João haktuir, hafoin akontesimentu ne’e, ekipa forénsiku PNTL evakua kedan kazál ne’e bá Ospitál Nasionál Guido Valadares (HNGV) hodi halo autópsia.
“Informasaun inisiál ne’ebé ita rekolla husi vítima nia oan, katak inséndiu ne’e akontese tanba serkuitu elétriku. Maibé ida-ne’e ita presiza kee kle’an liu hodi hatene motivu tanba saida mak mosu ou karik buat ruma akontese ita sei buka tuir,” nia katak.
Durante akontesimentu, kazál nia oan konsege sai husi uma atu rega no tenta atu ajuda nia inan-aman iha kuartu laran, maibé tanba ahi lakan maka’as, maka la konsege salva nia inan-aman, maibé konsege salva nia-an.
Jornalista : Natalino Costa
Editora : Julia Chatarina
